Zaninah ‘Bethlehem Arsi’ a êng dawn em?

Zote Honda MPL9-ah zanin dar 7:00 hian FC Bethlehem leh Chawnpui FC te an inkhel dawn. MPL club thar FCB tan zan inkhel hmasa ber tur a ni a, football ngaina Bethlehemin ṭantu an ngah ngei rinawm. Chawnpui FC-in ṭantu an ngah ve ang em tih chu zaninah a hriat ang.

FC Bethlehem coach Victor Lalbiakmawia chuan, "Fan-te pawh an zahawm tawh alawm. Chak ngei kan tum," tiin Vanglaini a hrilh. MPL club thar hian match thum aṭangin point khat an hmu tawh a, chak an la nei lo. An khingpui tur Chawnpui erawhin point li an hmu tawh a, Aizawl FC lakah chiah an la tlawm.

FCB tana chanchin ṭha erawh an player pawimawhte an dam a, Chawnpui lakah kim takin an khel thei dawn. Chanmari an hneh loh ṭumin captain Sena Ralte leh tlarhnunga a kawppui Hmangaihsanga te an chhawr thei lo a, tlarhnung an siksawi a ṭul phah.

Tun ṭumah erawh chanchin ṭha hriat tur a awm. Bengaluru FC reserve team-a khel ṭhin FC Lalhmunmawia inkhel turin a inpeih tawh a, tlarhnungah bul a rawn ṭan nghal dawn. FCB hi tun inelnaah goal riat ngawt chhuah tawhin tlarhnung pawp ber an ni a, FC-a hian danglamna a thlen thei dawn em tih chu zaninah a hriat theih ang.

Chawnpui FC coach Lalsangzuala Hmar chuan, "FC Bethlehem hi tlawm duh lo. Goal an chhuah tam pawh a tawp thlenga theihtawp chhuah ṭhin team an ni a, chuvangin chak tur chuan minute 90 theihtawp chhuah a ṭul dawn," tiin a sawi. Bethlehem hian goal riat tehmeuh chhuah mah se goal ruk an khung tawh a, round 3 thleng chuan anni aia khung tam chu Aizawl FC chauh an ni.

Bethlehem goal bawh a nat avangin tlarhnungah Lalrinchhana Tochhawng leh a ṭhiante an ṭan khawng a ṭul dawn a, chutihrualin chak an duh a nih chuan goal khung a ṭul. Coach Sanga chuan, "MC-a hi a ṭhal (groin) ah hliam a nei a, Notea pawh chutiang tho chu a ni. Tu emaw zawk chuan bul an ṭan ang a, an pahnih chuan bul an ṭan thei lo ang. David hi a damloh avangin a khelh loh a rinawm zawk," tiin Vanglaini a hrilh.

Bethlehem tan MC Malsawmzuala leh Lalliansanga (Notea) te 100% fit lo hi chanchin lawmawm tihin sawi theih mah se Chawnpui hian Inter Village 2022 final-a man of the match Laltlanzova (Zozoa) bakah forward ṭha dang David Laltlansanga (Avida) leh midfielder hmuhnawm Vanlalhriatzuala te an kawl tih an hriat a ṭha ang.