Boxer ropui Floyd Mayweather chuan UFC star Conor McGregor chu nakkumah a vawi hnih nan hmachhawn a duh thu a sawi a, tun ṭumah erawh an intawng a nih pawhin exhibition bout a ni thung ang. 
Kum 45 mi Mayweather hian August, 2017 khan a professional career-a a fight hnuhnung ber ni turin McGregor hi a hmachhawn a, round 10-naah technical knockout hmangin a hneh - hemi hnuah hian exhibition fight a nei leh nual tawh. 
Professional boxing-a vawi 50 inhneka vawi 50 chak thei Mayweather chuan McGregor nen inhmachhawn leh tura inbiakna an neih mek thu a sawi a, mahse, fight tak tak ni loin exhibition match a nih a ring zawk. 
Mayweather chuan, "Exhibition nge fight tak tak a nih dawnah kan la chiang lo a, kei chuan exhibition ni se, ka duh zawk ang," a ti a, fight tak tak hmachhawn turin upa tawh a inti deuh a ni mai thei. 
American boxer rothap chuan a dan pangngaiin sum chungchang a sawi zui a, Mayweather chuan, "Ka hlawh tur zat pawh min sawi hmuh tawh a, a tam dawn - Floyd Mayweather a nih chuan maktaduai 100 tel lo chu a rem lo a ni," a ti!
Mayweather hian tun Inrinniah pawh Japanese MMA star Mikuru Asakura nen exhibition fight an nei dawn a, khawvela boxer hlawhtling ber pawl hian, "Minute kua kan inhnek ang a, dollar maktaduai 20 vel ka hlawh ang - chhelo tak a ni," tiin a hlawh tur zat chu inchhuang takin a sawi. 
American boxer hian nikum khan YouTube star Logan Paul chu exhibition fight-ah tho a lo hmachhawn tawh a, a kum tam tawh hnuah pawh sum hailuh dan a a la hre reng. 
Hetihlai hian McGregor erawh Mayweather nen an inhnek hnuah ngai a awh leh tawh lo a, UFC-ah kir mah se match li a khelhah vawi khat chiah a chak - vawi thum a tlawm a, sum a ngah lehzual hnuah ngai a la awh lo.
July 2021-a a vawi hnih nana Dustin Poirier a ngam loh nawn khan a keah hliam a tuar a, mahse, kum 34 mi fighter hian dam lam a pan leh ṭan tawh niin an sawi. 
Mayweather leh McGregor hi an inhmachhawn a nih ngat chuan boruak an siam leh viauin a rinawm - a hmun atan hian Allegiant Stadium sawi rik a ni a, National Football League club Las Vegas Raiders-ten home atana an hman stadium-ah hian mipui 60,000 chuang an leng a ni.