UEFA Nations League-ah England-in match li an khel tawh a, chak an la nei lo - Three Lions dinhmun a chhe takzet a, match hnih khelh an la hmabakah vawi khat lek an tlawm pawhin League B-ah an tla dawn.
England-in Nations League-a khelh tur an la neih chu Italy leh Germany an ni a, Harry Kane leh a ṭhiante hmabak hi a awlsam lo hle - zanin dar 12:15-ah Italy an lenchilh ang. 
Three Lions hian Nations League finals khelh beiseina an nei thei tawh lo a, tuna an khelh chhan ber chu a vawi khat nana League B lama tlak thlak loh a ni!
Hetihlai hian Italy tan erawh finals beiseina a la nung a, khelh chhan tur an la nei - League group A3 inkhel dangah zanin dar 12:15 vek hian Germany leh Hungary an intawng bawk ang. 
Harh a ngai Euro 2020-ah England-in final an lut a, mahse, final-ah Italy ngam loin an tlawm - champion zo ta lo mah se World Cup 2018-ah semifinal an lo luh tawh bawk avangin Gareth Southgate chunga England beiseina chu sang tak a ni. 

England hian November 2021-ah San Marino chu 10-0 zeta sawpin World Cup an inpetkai bawk a, Football Association pawhin Southgate chunga rinna an nghahzia tihlan nan contract thar an pe a, December 2024 thleng atan contract thar an ziahpui. 
Mahse, 2022 a in her chhuak a, FA chairwoman Debbie Hewitt meuhin Southgate a chhan a ṭul a, tun hnai khan Jack Grealish chuan an coach hi a chhan bawk - chhan fo an ngaih chuan an dinhmun a derthawng ṭan tihna a ni!
Southgate-a tan a dinhmun chhe mek siamrem turin zaninah chak a ṭul a, World Cup hmaa international break a awm tawh dawn loh avangin tun hi insiamṭhat hun lai tak a ni bawk. 
Beiseina England hian Nations League-a an match hmasa berah Hungary chu 1-0 in an ngam lo a, Germany (1-1) leh Italy (0-0) inhnehtawkpui zuiin, an match hnuhnung berah Hungary chu 4-0 zeta ngam loin an mualpho chiang hle. 

Three Lions hian Nations League-ah goal khat chiah an la khung a, heti zat lek goal khung hi League A team-ah anni lo chu an awm lo - zanin inkhelah Harry Kane-a'n mawhphurhna a lak ngam a ṭul a, Brentford striker Ivan Toney pawhin ram tana hming chher a châk khawp ang. 
England result thlirleta thil langsar pakhat chu goal chhuah an hrat, tih hi a ni - match li an khelhah goal ruk an chhuah tawh a, tlarhnung an remphui a ngai tel tih a lang. 
Southgate-a duhthlan, number one Jordan Pickford chu hliam vangin si ban a nghak thei dawn lo a, Arsenal keeper Aaron Ramsdale chu England tan innghahna a ni dawn - a mawhphurhna a sang dawn. 
Italy lam hi Euro champion meuh ni chungin Italy-in World Cup an khel phak lo a, an la na takzet - Azzurri fan-te thinlung na tihdam nan Roberto Mancini-a'n Nations League-ah tal a team a chet ṭhatpui a ṭul a, hmabak erawh a hautak. 

Italy tan midfielder thiam bik Marco Verratti chu hliam vangin a inhnuhdawh a ṭul a, England tan chanchin lawmawm a tling - Italy hi Nations League-ah pawh an chuti lua bik lo. 
Azzurri hi match li an khelhah vawi khat chiah an la chak a, vawi hnih draw result an nei - goal nga chauh an la khung a, an lamah goal sarih a lut tawh thung! Goal venthiam vanga hmingṭha ṭhin Italy tan tlarhnung siamṭhat a ṭul.
Italy hian an match hnuhnung pahnihah England baka Hungary an la hmachhawn dawn avangin, an chak ve ve a, Germany-in point an hloh bawk chuan finals luhna chance an la nei a, an chance neih hi thlir liam mai chu an ui ang. 
Hei le Germany Hansi Flick enkawlna hnuaiah Germany an chuti lua bik lo - an match hnuhnung pangaah vawi khat chiah an la chak a, vawi li dang chu an khingpui an inhnehtawkpui. 

Zanin dar 12:15-ah rin loh taka League A Group 3 hmahruaitu Hungary an mikhual dawn a, a awlsam lo ang. Chutihrual chuan Germany hian an match hnuhnung berah 5-2 ngawtin Italy an sawp thei a, Hungary hneh tur khawp squad chu an nei. 
Mahse, Hungary hian Germany an hneh a, Italy-in England laka point thum an hlawhchhuah loh bawk chuan, finals an lut nghal thei dawn a, zaninah chak ngei an tum ngam ang - England vawi hnih hneh thei an ni, tih hriatsak a ṭha. 
Germany tan chak tur chuan Thomas Muller, Leroy Sane leh Timo Werner te goal hmaah an ke a hmui a ṭul dawn a, Hungary tan German football hrechiangtu, Mainz leh Hoffenheim forward hlui Ádám Szalai leh RB Leipzig midfielder Dominik Szoboszlai te an hlu sawt ang.