Vawiin tlai dar 4:00 hian RG Stadium, Mualpuiah Electric Veng leh Chhinga Veng te an inkhel dawn. Zote Honda MPL9-ah Electric Vengin point an la hmu lo a, Chhingows-in hneh loh an la nei lo thung. 
Electric Veng manager Vanlalsawma Colney chuan, "Point kan la hmu lo. Mahse kan hneh loh hi budget sang Chanmari FC, player ṭha tamna Mizoram Police leh I League club Aizawl FC te an ni a, veng mipuite pawhin min hrethiam viau chuan ka hria.
"Tunah erawh kan khingpui tur hi Chhinga Veng an ni a, ṭha tho mah se veng mipuite hian point hmuh an beisei ve tawh. Point hmuh ngei kan tum," tiin Vanglaini a hrilh a, player-te khauh zawka an enkawl thu a sawi tel bawk.
I Day Football-ah khan Electric Vengin Chhinga Veng hi 1-0 in an hneh lo a, an inthlauhna hi goal khat chauh a ni. Electric Veng hi an dam kim a, Chhing Veng erawhin an striker ṭha Lalrinzuala damlohna avangin an chhawr thei dawn lo.
Chhinga Veng coach Anand Gurung chuan, "Electric Vengte hi team nem anga lang si, chhungrila ṭha si an ni. Kan dah hniam thiang lo a, fimkhur takin kan khelh a ṭul a ni," tiin a sawi a, a ṭawng fimkhur hle.
Serchhip tlangval Rinzuala a awm loh avangin coach Anand-a ṭawng fimkhur hi a mak hran lo a, chutihrualin Chhingcows goal khungtu zingah Rinzuala hi a la tel lo. Tlarhma lamah Under 18 player Lalchhanchhuaha'n (Jerry) mawhphurhna sang tak a nei dawn a, tawnhriat nei ṭha zawk player dangten an thlawp ṭhat a ṭul ang.