Christoph Freund-a'n Chelsea a hnar

RB Salzburg sporting director Christoph Freund chuan Chelsea aṭangin sawmna hmu mah se Austrian club tana rinawm a thlang a, London lam panin a puanthuah a tel dawn ta lo.

Salzburg chuan an Sporting Director lalut tur hian Chelsea chuan pangngai taka dilna an thehluh loh thu an sawi a, hetihlai hian Freund leh Blues erawh an indawr ngei - mahse, Freund-a'n cham a thlang ta zawk.

Kum 45 mi Freund chuan, "Chelsea ang club-in min duh chuan, keima tan chawimawina a ni mai lo a, club tana kan hnathawhte chawimawina a ni. Mahse, ka tan FC Red Bull Salzburg hi a ṭha ber rih, tiin thutlukna ka siam a ni," a ti.

Freund chuan sawi zawmin, "Hmabak hlen loh kan la nei nual a, Bundesliga, Cup leh Champions League inelnaahte tih tur kan la nei - chutah chuan ka rilru zawng zawng ka pe a ni," a ti a, Chelsea lam a hawi ta lo.

Chelsea-ah hian club neitu thar Todd Boehly chuan sporting director hna a chelh lailawk a, American sumdawng hausa hian player lakluh kawnga coach thar atana lakluh Graham Potter pui turin Freund hi a duh a ni.

Mahse, Salzburg managing director Stephan Reiter chuan, "Freund hian kum tam tak chhung kan club tan hna ṭha tak a lo thawk tawh a, kum 2026 thleng cham turin contract thar a ziak zo chauh a ni.

"FC Red Bull Salzburg-ah sporting director a nih chhunzawm zel dawn tih ka sawi duh a, Chelsea-in an rim thu hi min hrilh a, ṭha takin titina pawh kan nei dun. Mahse, kan hnenah a cham dawn a, inthlak danglam turin eng indawrna mah kan dawng lo a ni," a ti.

Boehly leh Chelsea-a thuneitu ṭhenkhat chu, Salzburg leh RB Leipzig ten player lakluh kawnga data behchhana thil an tih dan chu tih ve an duh hle a, hei vang hian Freund hi a mimalin an dawr phawt a, mahse, an hlawhtling ta lo a ni.

Hetihlai hian Chelsea hian chanchin lawmawm lo dang hriat tur an nei belh a, commercial director Damian Willoughby chu hmeichhe football finance agent Catalina Kim hnena a message thawn mawi lo tak avangin a hna aṭangin an chawlhtir.

Willoughby hi Chelsea-ah 2007-10 inkar kha a lo thawk tawh a, Boehly leh a thawhpuiten a vawi hnih nan an lalut leh - mahse, thla khat em pawh a thawh hmain Manchester City leh EA Sports tan pawha thawk tawh hi an ban a ni.

C&P Sports Group neitu Catalina Kim chuan Willoughby hnen aṭanga a message dawn hi Chelsea head of business Tim Glick hnenah a hmuh a, Willoughby-a'n Chelsea a zawm hma lawka thil thleng ni mah se London club hian an chawlhtir ta tho a, an club chu langtlang taka kalpui zel an tum thu an sawi bawk.