Brazil coach Tite chuan a player pawimawh zinga mi Vinicius Junior-a'n a goal khung a lawm dan chu thil pangngai a nih thu a sawi a, an hlim avanga an lam a nih pawhin midang tana ngaimawh tur nia a hriat loh thu a sawi bawk.
Real Madrid forward Vinicius hi a goal khung lawm nan khelmual sirah a lam ṭhin, hei hi player dang ṭhenkhat pawhin an tih dan a ni. Tun hnaia Atletico Madrid nen an inkhelh dawn khan hei hian sawi a hlawh.
Tite chuan, "Vini chauh a ni lo, infiammi dangte pawhin infiamna huanga an talent tipung se la, an lawmna chu hlim takin lantir rawh se. A bik takin ani hi ka hriatchian a ni a, khingpuite tham lo taka ti ṭhin a ni lo, zah takin a en ṭhin zawk.
"Khelmual chhunga mi bum, goal khung, thiam taka mi pass leh football cheimawina hrang hrangte kha tizel rawh," tiin Vinicius chu a mize pangngai chhawmnung zel turin a fuih a, an coach duh dan hi a tihhlawhtlin ngei pawh a rinawm.
Brazil hian zanin dar 12:00 hian Ghana an hmachhawn dawn a, World Cup inbuatsaih nan September 27 zanah Serbia an hmachhawn leh bawk ang. Tite tan Qatar World Cup an khelh huna a team rem dan tur enchhinna hun a ni ang.
Ghana hian Arsenal midfielder Thomas Partey leh Leicester City centre-back Daniel Amartey te an nei ve tho a, team ṭha pangngai tak ni mah se world champion vawi nga ni tawh Brazil hneh tur chuan squad an nei ṭha tawk lo.
Brazil squad: Goalkeepers: Alisson (Liverpool/ENG), Ederson (Manchester City/ENG), Weverton (Palmeiras).

Defenders: Danilo (Juventus/ITA), Alex Sandro (Juventus/ITA), Alex Telles (Sevilla/ESP), Marquinhos (PSG/FRA), Eder Militao (Real Madrid/ESP), Thiago Silva (Chelsea/ENG), Bremer (Juventus/ITA), Roger Ibanez (Roma, ITA).
Midfielders: Casemiro (Manchester United/ENG), Bruno Guimaraes (Newcastle/ENG), Fred (Manchester United/ENG), Fabinho (Liverpool/ENG), Lucas Paqueta (West Ham/ENG), Everton Ribeiro (Flamengo).
Forwards: Antony (Manchester United/ENG), Roberto Firmino (Liverpool/ENG), Matheus Cunha (Atletico Madrid/ESP), Neymar (PSG/FRA), Pedro (Flamengo), Raphinha (Barcelona/ESP), Richarlison (Tottenham/ENG), Rodrygo (Real Madrid/ESP), Vinicius Jr (Real Madrid/ESP).