Quarterfinal-ah Raducanu a lut

Korea Open khelh laiah Emma Raducanu chuan nimin khan quarterfinal a inhlangkai. British tleirawl hian Yanina Wickmayer chu 6-3, 7-5 in a hneh a, an match lehpekah chuan seeded pathumna Magda Linette a hmachhawn leh ang.

World number 77 Raducanu hian bul a ṭan fuh tawk lo, mahse set hmasa zawk la tur hian a tawp lamah a khingpui service a zawnin vawi thum a chhuhsak thei hial a, set hnihnaah pawh inkhel tawk viau mah se a dingchang zawk a ni.

Kum 19 mi Raducanu chuan, "Ni danga ka match khelh aiin ka service a ṭha ve deuh a, chu chuan nasa takin min pui. Set hnihnaah 4-1 in hma ka hruai fal thei a, kha tih laia Yanina min rawn beih letna kha a na hle.

"Beidawng duh loa kan khingpui ten min bei a nih chuan inkhelh a harsa ṭhin," tiin a sawi a, a hmachhawn leh tur Linette pawh mi tumruh a nih avangin awlsam taka paltlang theih a nih loh tur thu a sawi bawk.