Naomi Osaka a che fuh rei thei lo. Pan Pacific Open khelh lai aṭangin a inhnukdawk, second round-a a khingpui tur Beatriz Haddad Maia chu inkhelh hah ngai loin third round-ah a inhlangkai ta a ni.
Kum 24 mi Osaka hi a match hmasaah a khingpui a inhliam, game hnihna pawh an khel zo lo. Match hnihna khelh hmain a pum a na a, inelna hmachhawn luih hram ai chuan chawlh lak rih a thlang ta zawk.
Grand Slam vawi li champion tawh Osaka chuan, "Japan rama Pan Pacific Open khelh hi chu ka tan a nuam a, chawimawina a ni tel nghal bawk. Min ṭantu tam tak hmaa inkhelh hi nuam ka ti a, ka chhunzawm thei lo tur hi pawi ka ti takzet.
"Hun rei lotê ka hman chhunga min thlawpna vangin lawmthu ka sawi, kumin hi a tawpna a ni lo ang. Hun harsa leh hlimawm hi a inthlen chhawk ve reng a, ka tan kumin chu lungngaih kum a ni," tiin a sawi.
Japanese nula Osaka hian result ṭha a nei hleihthei lo a, world number 1 hial pawh lo ni tawh ṭhin mah se player hlauhawm zingah a tel phak ta lo. Kum 24 mi chauh a la nih avangin hmabak erawh a la nei, a tan season tharah bul ṭan turin hun a la awm.
Player langsar dang Karolina Pliskova a chak lo. Seeded parukna hi Petra Martic lakah 6-3, 6-4 in a tlawm, Pliskova leh Osaka te an awm loh takah chuan player dang tan champion theihna kawng a inhawng zau sawt ang.