PL fan-te chet fimkhur a ngai dawn

Premier League club thuneitute inhmukhawm chuan, PL club khelmuala fans che mawilote hrem dan tur an ti chhuak a, mipui vantlang nun tibuai zawng leh, hlauhawm taka che ṭhinte chu automatic club 'ban' an ni tawh dawn a, a hremna nep ber pawh kum khat chhung atana club-in an 'ban' a ni tawh dawn.

Premier League thuneitute thutlukna hi hman nghal tur a ni dawn a, he dan hi fan-te zinga halmawi hal, thil khu chhuak thei keng leh phalna la loa khelmual chhunga lutte venna atana duan a ni a, fans uchuak deuh tan chuan a chep ta hle.

English top flight league thuneitute chuan inlungrual taka thutlukna siam an nih thu an sawi a, naupang zinga che mawi lo an awm chuan anmahni bakah hruaitu nu leh pa emaw, anmahni hruaitu hrim hrim chu kum khat tho hrem tur an ni ang.

Premier League-ah hian fans ṭhenkhat chet dan avanga harsatna tawh sawi tur a awm nual tawh a, fan-te automatic-a hremna bakah hian club-te tan pawh fan-te chet dan avanga hremna a hma aiin a na tawh dawn.

Aston Villa keeper Robin Olsen chu season hmasa Premier League tawp nia Manchester City nen an inkhelh khan fans lam aṭangin beih a tawk a, Nottingham Forest fan chu Championship playoff semifinal-a Sheffield United captain Billy Sharp a tauh avangin lunginah khung a ni a, Tottenham Hotspur defender Eric Dier chuan a chhungte tan khualmuala inkhel en a nawm loh ṭhin thu a sawi bawk.