Vietnam-a khelh India tan a ṭha - Bhaichung

Indian football legend Bhaichung Bhutia chuan Vietnam-a friendly match khelh chu India tan a ṭhat thu a sawi a, Blue Tigers hian Vietnam-ah hian mualneitu team bakah Singapore chu friendly match a khelhpui dawn a ni.

Ruahman dan chuan India hian Hung Thinh Friendly Football Tournament-ah Singapore leh Vietnam an inkhelhpui dawn a, Inrinni tlai dar 5:30-ah Singapore nena inkhelin, September 27, Thawhlehni tlai dar 5:30-ah inelna thlengtu Vietnam nen an inkhel leh ang.

Bhaichung chuan, "Vietnam-a India an inkhel tur hi national team tan thil ṭha tak a ni. Vietnam hi team ṭha tak an ni a, chutiang chiah chuan Singapore pawh an ni bawk. Kan player-te tan tawnhriat ṭha tak a ni thei dawn a ni," a ti.

India Under 23 chuan kum 2002 khan Vietnam-ah hian LG Cup nomawi an lo chawi tawh a, senior player quota-a tel Bhaichung Bhutia chu captain niin, final-ah Vietnam an hneh a ni.

AIFF President-a tling zo ta lo Bhaichung chuan India coach Igor Stimac-a contract pawhsei a ni chu lawmawm a tih thu a sawi bawk a, Asian Cup 2023 tan rah ṭha a chhuah a beisei.

Bhaichung chuan, "Asian Cup hmachhawn turin hun kan ngah tawk tawh lo a, Stimac-a contract pawhsei a ni hi a lawmawm hle. Contract pawhsei hian coach leh player te Asian Cup inbuatsaih nan hun tam zawk a pe thei dawn a, tuna kan inkhel tur leh Asia Cup kan inbuatsaihna pawh a ṭhat sawt ka beisei," a ti.

Stimac hian Asian Cup 2023 thleng India enkawl turin a contract a pawtsei a, Asia khawmualpuia football inelna sang berah hian quarterfinal a hruai thleng thei a nih chuan a contract hi pawhsei a ni bawk ang.

Croatian coach Stimac-a contract hi tun thlaa tawp tur a ni a, mahse, IM Vijayan kaihhruaina hnuaia AIFF technical committee ṭhukhawm chuan rawih nawn turin an rel - hei hi AIFF executive committee chuan a pawmsak leh a ni.

Player a nih laia Croatia tana vawi 53 inlan thei Stimac hian May 2019 khan kum hnih chhung atan Blue Tigers coach hna a chelh ṭan a, 2021 khan September, 2021 thleng a contract pawtsei lehin, September-ah hian kum khat dang atan pawhsei sak a ni leh a, tunah Asian Cup 2023 thleng team enkawl turin contract an pawtsei leh ta.

Asian Cup 2023 hi June 16, 2023-ah khelh ṭan tur a ni a, July 16 thleng a awh dawn - Croatia national team pawh enkawl tawh Stimac hian thla khatah nuai 18 vel a hlawh mek nia sawi a ni.