A zawna vawi thum chak Wawrinka

Stan Wawrinka chuan kum 2020 hnua a khelh tluan ber ṭum a tawng a, season hnih hnua a vawi khat nan a zawnin match thum a chak ve leh ta. Moselle Open khelh laiah last 16 hial a inhlangkai ve leh ta a ni.

Grand Slam vawi thum champion tawh Wawrinka hian Joao Sousa chu 7-6 (7/1), 6-2 in a hneh, a match lehpeka a hmachhawn tur hi Daniil Medvedev a nih avangin hna a hautak dawn hle.

Kum 37 mi Wawrinka hi a vanglai chuan player hlauhawm berte zinga mi a ni phak, mahse a hun hnuhnung lamah hliamin a tibuai nasa. Tennis la chawlhsan chiah lo mah se tun hma ang kha chuan a khel chhuak thei tawh lo.

Swiss star Wawrinka chuan, "Qualifier match hnihah hnehna kan chang hmasa a, main draw khelh hun atan inrintawkna nasa tak ka neih theih phah. Hnehna ka chan chu thuhran ni se, ka khelh danah ka lawm," tiin a sawi.

Inkhel dangah Dominic Thiem a chak. Hun rei tak hliam vanga buai ve tawh bawk Thiem hian 6-3, 7-6 (7/3) in Richard Gasquet a hneh a, hnehna chang turin vanneihna a mamawh tel bawk.

US Open 2020 champion Thiem hi tunah chuan world number 182-na a ni daih, season tawp lamah ranking siam ṭhat leh hram a tum. A match lehpekah chuan seeded pahnihna Hubert Hurkacz a hmachhawn leh ang.