Cannavaro-a'n Benevento enkawl dawn

Italian defender ropui ni ṭhin Fabio Cannavaro chuan team enkawl hna a thawk leh tawh dawn, Europe khawmualpui bika manager a nihna hmasa ber atan Serie A club Benevento a enkawl dawn.

Kum 49 mi Cannavaro hi a vanglai chuan khawvel defender ṭha berte zinga mi a ni. Club huanga hlawhtlinna hrang hrang a chan bakah 2006 World Cup-ah khan an ram a champion pui, world champion an nih ṭum hian captain armband hrengtu a ni.

Parma, Juventus, Inter Milan leh Real Madrid tana khel tawh defender hian 2011 khan inkhelh a chawlhsan. Asia khawmualpuiah coaching hna thawk turin a kal a, China leh Saudi Arabia-ah hna a thawk tawh - 2019 khan Chinese national team chu chawlhkar ruk chhung a lo enkawl tawh a ni.

Asian champion vawi hnih ni tawh Guangzhou FC nen October, 2021 khan an inṭhen a, a hnu lamah hnathawh a la nei lo. Chawlh a neih deuh vang vang hnuah Benevento a enkawl leh dawn.

Benevento enkawl hi chona a ni ang, 2020-21 season tawpah khan Serie A aṭangin an tlahniam a, tunah hian Italian football inelna sang pahnihnaah inlanin, match ruk aṭangin point sarih an hmu a, 13-naah an awm mek.