German football kaihhnawihah Covid-19 kai mi 10 an awm

Bundesliga leh Bundesliga 2 player leh coaching staff - an vaiin mi 1,724 chu Covid-19 an kai em tih endik a ni a, an zinga 10 chuan coronavirus an kai tih hmuhchhuah a ni.

German ramah hian April thla chawhnu lam aṭang khan club ṭhenkhat chuan training an nei ṭan leh tawh, tun thla tawp lam aṭang hian league khelh chhunzawm leh theih an beisei; sorkar chuan May 6, vawiin hian infiamna lama an thu thar an puang ang.

Bundesliga hi German rama football inelna sang ber a ni a, a hnuaiah Bundesliga 2 a awm. Tun ṭuma Covid-19 kai leh kai lo an endikna hi a thawh khatna chauh a ni a, tun kar tawp lam hian a thawh hnih nan endik an ni leh dawn.

German Football League DFL chuan, "Endik thawh hnihna hi tun kar chhunga neih leh a ni ang, hri kai hmuh chhuahte uluk taka enkawl an ni dawn. Endik hmasakah hri kai hmuh chhuah an awm avangin fimkhur lehzual a kal a ngai," an ti.

Hri kai 10 zingah hian kar hmasa lama hriat tawh Cologne mi (player leh staff) pathum chu chhiar tel an ni. Anni pathum hian langsar takin natna an nei hran lo a, mahse hri an kai ngei tih chu finfiah a ni thung.

Cologne chuan thu chhuah siamin, "Player tu pawh ni se, coronavirus an kai em tih vawi hnih endik a nih hnu a, hri an kai lo ngei a ni tih hriat chiante chauh training leh inkhelh phalsak an ni," an ti.

March thla laihawl aṭang khan German rama football inelna hi chawlh lailawk a ni, hri leng vangin buai viau mah se DFL chuan league khelh zawh ngei an duh; club lam pawhin fimkhur tak chungin training hautak lo zawk chu an nei tawh.

Mahse, sorkar lam aṭangin phalna an la hmu lo. Kar hmasa khan German chancellor Angela Merkel chuan, "Infiamna lama kan kalphung tur chu May 6, Nilainiah puan a ni ang," tiin a lo sawi tawh, zanin hian Bundesliga leh a hnuai lam club-te awmdan tur chu a hriat dawn.

Football thuneitu beisei dan hmasaah chuan, European league zinga a hmasa ber ni turin May 16 emaw May 23-ah emaw inkhelh chhunzawm leh theih an beisei. Tuna a lan dan chuan hri kai thar an awm belh zel avangin an tum ang hunah an khelh chhunzawm a rinawm loh.

DFL hian league khelh chhunzawm hma an duh chhan hi TV lama pek chhuahna leh sumdawnna lama an thawhpuite nena inremna an neih tawh sa anga kal an duh vang niin a lang, an inrem dan chuan June 30-ah league khelh zawh a ngai.

German club-te hian June 30 hmain league an khel zo thei lo emaw, tun season hi an chhunzawm thei ta lo emaw a nih chuan TV lam aṭang an sum hmuh tur dollar maktaduai 325 vel hloh thei an ni; DFL chuan a hnuaia club ten sum lama harsatna an tawh theih thu an lo sawi tawh.

An ram sorkar inkaihhruaina danah chuan 'Covid-19 kai nena inhnaih chilh mi tawh phawt chu ni 14 khung hran tur an ni' a, tun hnaiah hri kai hmuh chhuah thar 10 an awm avangin mi tam tak chu khung hran an ngai dawn tih a chiang.

Germany interior minister, sports lam changtu Horst Seehofer chuan kar hmasa khan league khelh zawm theih a beisei thu a lo sawi hmawr hmuh tawh. Mahse, vawiina sorkar thu chhuak an puan hma chuan engmah sawi chian theih a la ni lo.

Sorkar thupuangtu Steve Alter chuan, "Seehofer thusawi kha a la pangngai reng, chutih rualin tumah mipui punkhawmna leh vantlang thil tih ang chu khap a la ni reng," a ti. Football an khel zawm a nih pawhin entu an awm lo ang.