June-ah La Liga khelh beisei

Spanish football inelna sang ber La Liga chu June thlaah khelh chhunzawm leh theih an beisei, tun kar chhung hian club ṭhenkhat chuan hautak lo zawkin training neih ṭan an tum leh tawh bawk.

Football thuneitu leh hriselna kawnga hnathawkte inrem dan chuan player-ten mimal training an nei ang, tun hma lama  a huho a training an neih pangngai ang kha chu a la ni dawn rih lo tihna a ni.

United States dawtah Spain hi Covid-19 kai tamna ram a ni, an rama football inelna sang La Liga hi March thla aṭang khan chawlh lailawk a lo ni tawh. Match khelh hmabak 11 la awmah Barcelona chuan an elpui Real Madrid lakah point hnihin hma an hruai mek.

La Liga chuan thuchhuah siamin, "Tuna ruahmanna kan siam hi chawlh kar li chhung hman tura tih chhin a ni, sorkar lam thuchhuak a zirin tih danglam theih reng a ni bawk. June-a inelna nei tur chuan zawi muanga inbuatsaihna lo neih lawk a ngai," an ti.