Champion lai Real inlan zan
Real Madrid-in Zinedine Zidane-a kaihhruaina hnuaiah Champions League nomawi humhim an tum dawn. Spanish club lian hian zanin dar 12:15 hian APOEL an mikhual dawn a, Sony Ten 1-ah a en theih ang.
Group H inkhela ngaihven hlawh zawk tur erawh Tottenham Hotspur leh Borussia Dortmund te inkhel a ni ang a, Wembley Stadium-a inkhel hi Sony Ten 3-ah a en theih ang.
A vawi thum nan
Real Madrid hian Zidane-a kaihhruaina hnuaiah record siamin Champions League hming a put hnua kum zawna champion thei hmasa ber an ni. Los Blancos hian inelnaah vawi 12 champion tawhin nomawi chawi ngun ber an ni a, Europe-a roreltu an nihna hi sawhnghet turin a vawi thum nan champion an tum ang.
Whites-in La Liga khel thei lo Cristiano Ronaldo an chhawr thei dawn a, Portugal captain telna team hi chu La Liga-a Valencia leh Levante te draw-tu Real nen chuan a danglam tawh ang.
Real hian an mual Santiago Bernabeu-ah bul an ṭan dawn a, APOEL tan hmabak a hautak ang. Los Blancos hian an mualah match 14 chhung chu hneh loh an tawng tawh lo a, heng zinga vawi 12-ah hian an chak. An chak loh hnuhnun ber chu kum 2015-a Schalke an hneh loh ṭum daih tawh kha a ni.
Chak tur Real
Real tana harsatna awmchhun chu no. 9 position-a khel Karim Benzema inhliam a ni a, French forward awm lo hi channa lian tak a ni a, harsatna belhchhah turin a thlak thei ber tur ber Alvaro Morata chu Chelsea-ah hralh a ni bawk.
Amaherawhchu, Real bul ṭanna tur a fuh a, an khingpui tur Cyprus club APOEL tan tun hi Champions League group stage an vawi li khelhna tur chauh a ni. Club pahnih hi 2011-12 season khan quarterfinal-ah an inhmachhawn a, Real hian aggregate-ah 8-2 in hnehna an chang.
Zinedine Zidane-a'n Real a enkawl hnuah team ṭha tak a din a, a hun laia khawvel player manto ber Gareth Bale pawhin khelhna hmun a chang pha ṭha lo. Spanish midfielder Isco a par ṭan a, hmabak nei êng Marco Asensio an neih bawk nen Real Madrid hian kum tam an la daih dawn a, zaninah erawh Asensio hian bench aṭangin bul a ṭan a rinawm.
Real manager Zidane chuan, "Kan rilru put hmang a dik lo a, hneh sa khelhin kan khel a ni. Kan insiam ṭhat a ṭul ang," tiin league lama an chet ṭhat loh vanga a lungawi loh thu a sawi a, Champions League-ah an lungawi lohna an hri thla ang.
Wembley Stadium lamah...
Tottenham Hotspur-in season liam ta khan Wembley Stadium hi Europe inelna bikah home match khelh nan an hmang a, an record a chhuanawm loh hle. Spurs hian Champions League match thum Wembley Stadium-a an khelhah vawi hnih chak loin vawi khat chiah an chak a, Europa League-a an tlak hnuah pawh an muala Belgian club Gent an draw vangin an tla lehnghal bawk.
Tun season-ah pawh Spurs hian Wembley Stadium-a league match vawi hnih an khelh tawhah chak an la nei lo a, khualmuala match hnih an khelhah erawh an chak ve ve thung. An khingpui tur Dortmund hi Spurs hian 2015-16 season khan Europa League-ah an hmachhawn a, aggregate-ah 5-1 in an chak lo a, an player pawimawh Dele Alli-a'n match thum hremna a tuar ṭan ang a, inhliam vangin Victor Wanyama a la inlan thei lo bawk ang.
Spurs tana thu lawmawm erawh an thiampuipa Harry Kane-a'n goal an khung leh tawh a, English striker hian kartawpa sum hmang tam Everton an sawp ṭumin goal hnih a khung. Ajax aṭanga an lak thar defender Davinson Sanchez a rintlak viau bawk.
Argentine manager Mauricio Pochettino chuan, "Batistuta hi goal khung khawl a ni a, a huaisen a, a chakin a professional em em bawk. Chutihrualin kei chuan Harry leh Batistuta te hi huang khatah ka dah a, English striker hi Argentine striker ai hian a la ṭha thei bawk," tiin a sawi. Poch hian Kane hi a enkawl a, Argentina legend Gabriel Batistuta hi 1991 leh 2002 inkara an khelhpui a nih bawk avangin player pahnih khaikhin tur hian a hrechiang ve ve.
Borussia Dortmund-in inhliam vangin Marco Reus chu Champions League khel tur squad-ah an telh lo a, City aṭanga German club zawmtu English rawlthar Jadon Sancho pawh a la tel pha lo. Inhliam vangin Raphael Guerreiro, Andre Schurrle, Erik Durm leh Sebastian Rode te an tel dawn lo a, an ṭhat dan berin Wembley Stadium an tlawh thei dawn lo.
Dortmund hian inhliam an ngah bakah match hnuhnung berah SC Freiburg goal awm loin an draw a, Spurs tan tun season-a Wembley Stadium-a an chak hmasa ber a ni thei ang.
Zanin Inkhel Tur
Group E
Maribor 12:15 AM Spartak Moscow
Liverpool 12:15 AM Sevilla
Group F
Feyenoord 12:15 AM Manchester City
Shakhtar Donetsk 12:15 AM Napoli
Group G
RB Leipzig 12:15 AM Monaco
Porto 12:15 AM Besiktas
Group H
Real Madrid 12:15 AM APOEL
Tottenham Hotspur 12:15 AM Borussia Dortmund