Sky leh EFL an inrem
Premier League hnuaia English Football League club inkhel ṭhenkhatte live-a pekchhuah theihna chu Sky-in kum nga chhung atan an nei ta a, EFL nena inremna an neihna zat hi pound maktaduai 600 a tling - kar laklawha Championship match zawng zawng chu live-in an pe chhuak thei dawn tihna a ni.
Inremna hi 2019-2024 chhung atana rin tur a ni a, deal an neih lai aṭanga chhut chuan pawisa punna zat hi 36% ngawt a ni. Sky hian league match bakah Carabao Cup, Checkatrade Trophy leh playoff te chu May 2024 thleng live theihna dan an nei dawn a, kar laklawha league match an live loh chuan club-ten anmahni website kaltlangin live-in an pe chhuak thei ang.
Tuna EFL television deal kal mek hi chu 2018-19 tawp rualin a tawp tawh dawn a, a hlut zawng hi season khatah pound maktaduai 88.3 a ni. Tuna an inremna aṭanga chhut chuan pound maktaduai 120-ah a pung chho dawn tihna a ni thung.
Sky hian a tam berah EFL match 150 chu season khatah an pe chhuak dawn a, heng zingah hian kar laklawha Championship match 16 awmin League One leh League Two match 20 aia tlem lo ve ve an pekchhuah a ṭul dawn bawk a ni.