Chhinga Veng dan theih an ni em?

Lalsangzuala Hmar kaih­hruaina hnuaiah Chhinga Veng vawi 14 an chak zawn tawh a, MFA Super Cup leh I Day Football a champion Chhingcows hi Mizoram Premier League-ah pawh an kal fawr nghal hle.

Mizo striker zinga talent nei ṭha ber zinga mi Malsawmfela'n goal khung a bansan lo a, midfielder theihna sang R. Malsawmtluanga'n goal a khung bakah goal khung turin a ṭhiante a siam chhunzawm zel avangin Chhinga Veng kawng bumboh tura ngaih pawh an la mam vek.

Tu nge pawimawh?

Tun dinhmuna tualchhung football-ah team ṭha ber tiha chhal ngam chu Chhinga Veng an ni a, coach Sanga hnuaia an result ṭha tak avang hian za zain an pawm pawh a rinawm.

Chhingcows-ah hian tu nge pawimawh ber hriatthiam a har hle. Team ṭha din thei tura sum thawhtu an pawimawh a, player la khawmtu tualchhung football hrechiang an neih an hlawkpui a, coach Sanga leh player-te bakah an veng mipui an ṭangkai viau bawk.

An sang tual tual

Chhinga Vengin MFA Super Cup-a match ruk an khelhah hnehna chang vekin chung zingah chuan MPL club pahnih Bethlehem Vengthlang FC leh Chanmari West te an tel a, harsatna lian an tawk lo.

I Day Football-ah Chhing­cows an danglam chuang lo a, team ṭha vek telna inelnaah hian match ruk khelin an chak leh vek bawk. Chhinga Veng hian group stage an awmpui Chanmari West FC, Mizoram Police, Chanmari FC leh Rhino Charge te chu an hneh satliah lo a, goal nga khung tlingin an sawp vek.

Semifinal leh final-ah erawh Chhinga Veng hian Bethlehem Vengthlang leh Chanmari FC an hneh danah harsatna an tawk a, amaherawhchu MPL a thlen meuh chuan Mizoram Police leh Chanmari West te harsatna nei loin an hneh.

Dan theih an ni em?

Chhinga Veng hian foreign player pawh nei loa match 14 tehmeuh thunun chunga an chak zawn thei hi a ropui a, chutihrualin foreign player nei tan chuan dan theih tur an ni.

Chhingcows hian Sanga hnuaiah MPL club pathum Aizawl FC, Ramhlun North FC leh Dinthar FC te an la hmachhawn lo a, heng club-te hi foreigner nei vek an ni. A bik takin first division aṭanga an elpui Ramhlun North hi hneh an harsat a, heivang tak hian Chhinga Veng hian nomawi pahnih chawi tawhin MPL6 hmahruaitu ni mah se tualchhung football an thunun hlaka sawi erawh a la rem lo.

Sanga hote hi an dan theih tih hriat mah se dan erawh an la harsa zel ang. Chhinga Veng forward Sawmfela hian MFA Super Cup leh I Day Football ringawtah goal 17 a khung a, Ramhlun South tlangval hian MPL6-ah goal thum a khung leh tawh.

Sawmfela hian MPL best player leh best forward chawi­mawina dawng tawh mah se top scorer erawh a la ni lo a, ṭum hnihah erawh top scorer goal khung zat a khung thung. Tun hi Chhinga Veng hun a nih chuan Sawmfela hun a inher chhuak dawn tihna a ni thei a, amaherawhchu dan an harsat ang bawkin an hmabak hi a awlsam lo ang.