British club zingah Liverpool-in rin an hlawh ber!
Kum 2014-15 hnuah a vawi khat nan Liverpool-in Champions League an khel dawn - Zanin dar 12:15-ah Sevilla an mikhual dawn a, 2015-16 Europa League final-a an ngam loh team lakah zahngaihna lantir an tum dawn lo. Inkhel hi Sony Ten 2-ah live-in a en theih ang.
Reds fan-te tana thu hriat nuam tak tur chu Champions League zirchianna neitu Gracenote Sports chuan nimin khan an zirchianna an ti chhuak a, British club zingah Liverpool chuan last 16 luh theihna chance an nei sang ber an ti - Reds-in knockout round an luhna chance hi 81% niin an tarlang.
Reds dinhmun
Gracenote Sports hian draw neih a nih hma khan Liverpool hi last 16 lut tura an beisei zingah an dah tel lo a, mah se Group E-ah Sevilla, Maribor leh Spartak Moscow te nena dah ho an nih takah chuan knockout round lut turin British club zingah rin an kai ber ta.
Europe-a club inelna sang berah hian Premier League club zingah Chelsea, Manchester United, Manchester City leh Tottenham Hotspur an inlan dawn bawk a, Scottish Premiership champion Celtic an awm bawk - heng zawng ai hian Liverpool-in rin an hlawh tihna a ni.
Zirchianna chu
Gracenote hian zirchianna atan Euro Club Index ranking an neih chu an hmang a, uluk taka zirchianna an neih hnuah a result hi an puang. Sports data company lar hian season hmasa pawh khan last 16 lut tur hi an lo ringlawk tawh a, heng zinga club 15 chu an ring dik.
Tun dinhmunah Real Madrid, Barcelona leh Bayern Munich-te chu last 16 lut turin 97% ngawt chance an neiah ngaih a ni a, Paris St-Germain (93%) leh Juventus (88%) ten an hlat lo. Reds tan last 16 lut tura rinna 81% hi a tam viaua a lan rualin zanina an hmachhawn tur Sevilla-in 84% an nei thung a, Jurgen Klopp-a naute aiin Spanish club hian rin an hlawh zawk tihna a ni.
Engtinnge Coutinho?
Liverpool-in chhawr turin Philippe Coutinho an nei leh tawh a, Brazilian midfielder hi inlan dawn ta se Reds hi eng angin nge an inrem ang, tih chu thil hriat châkawm a ni - tlarhmaah Sadio Mane, Roberto Firmino leh Mohamed Salah an awm sa bawk avangin Reds tlarhma hi hmachhawn an hautak dawn.
Merseyside club hian an match hnuhnung berah Manchester City chu 5-0 ngawtin an ngam lo a, Klopp-a'n "kan theihnghilh a ṭul" tiin sawi mah se an mangchhe neih hi thaibo tur chuan Sevilla lakah result duhawm an hlawhchhuah a ṭul ang.
Sevilla thar zawk?
Spanish club hi 2015-16 Europa League final-a Liverpool an hneh aṭang kha chuan team dang daih an ni tawh. Coach thar Eduardo Berizzo enkawlna hnuaiah tun season-ah league match thum an khel tawh a, point sarih nei tawhin tlawm hmel an la hmu lo - inrintawkna nen Anfield an pan ang.
Sevilla tan hian tlarhmaah Luis Muriel chu innghahna tur a ni dawn a, season hmasaa Sampdoria tana goal 11 khunga assist pakua neitu hi en liam ngawt chi a ni lo ang. Hetihlai hian nipui transfer-a an lak tho Nolito leh Johannes Geis chu hliam vangin England-ah hruai tel an ni lo a, Inter Milan aṭanga an lak let Ever Banega leh Premier League hrechiangtu Jesus Navas te an chhawr thei thung ang.