Nadal champion chhan chu thawhrim vang

Rafael Nadal-a'n mipuiin a laka rinna an hloh tawh hnua ropui taka a rawn kir leh theihna chhan chu tennis a hmangaih vang leh inpekna a neih san vang a nih thu a sawi chhuak. Spain tlangval hian kuminah Australian Open leh US Open nomawi a chawi.

World number 1 Nadal chuan, "Kum 31 mi ka ni tawh a, ka kum pawh a tam ve tawh. Mahse, tuktin mai hian phur takin court lam ka pan a, hmasawnna pakhat tal chharchhuah ka tum ṭhin," tiin a sawi. Kum 2013 hnua a vawi khat nan kuminah Nadal hian season khat chhungin major title a la leh chiah a ni.

Grand Slam vawi 16 cham­pion tawh Nadal chuan sawi zawmin, "Tennis game hi ka hmangaih a, mimal leh he game-in hma a sawn theih nan ka theihtawp ka chhuah ṭhin. Player chhuak thar ṭha tak takte nena inel hi nuam ka ti a, an mahniah hmasawn duhna thinlung an nei tih ka hriat phei chuan ka lawm thei hle," a ti.

Open Era chinah Roger Federer-a'n Grand Slam vawi 19 champion tawhin Swiss star hi record nei ṭha ber a ni a, a dawt chiaha awm chu Nadal (16 titles) hi a ni. Federer hi tennis mipa player piang tawh zinga ropui bera ngaih a ni. Amaherawhchu, Federer leh Nadal te an intawn tawhna bikah chuan Nadal hi (23-14) in a chungnung zawk.

US Open a liam

Kumina Grand Slam hnu­hnung ber tur US Open chu Pathianni zan khan khelh zawh a ni a, final-ah Nadal chuan Kevin Anderson hnehin a vawi thum nan a champion. Hard court inelna lianah hian tun hmain player panga chu vawi thum aia tam an champion thei tawh a, Nadal hi player parukna a ni.

Tennis legend Jimmy Connors, Roger Federer, Ivan Lendl, John McEnroe leh Pete Sampras te hi sulhnu nei ṭha an ni - tun hun erawh Rafael Nadal hming lamrik hun a ni thung. King of Clay hi hard caurt-ah pawh dal zo an awm chuang lo.

Kumin US Open-ah hian tunhma lama champion tawh Serena Williams, Novak Djokovic, Andy Murray leh Stan Wawrinka, te bakah final khel tawh Victoria Azarenka leh Kei Nishikori te an inlan thei lo vek. Player langsar ṭhenkhat an inlan theih loh avangin kum dang a phak lo mai ang tia sawi pawh a awm hman.

Amaherawhchu, inelna tak neih chhoh a ni a, player ropui Federer leh Nadal ten an thiamna tak an pholan chhoh takah chuan midang tan hmun a awm meuh lo a ni. Juan Martin del Potro-a'n a tournament ngainat berah mipui ṭan hlawh khawpin a khel chhuak a, player beiseiawm Dominic Thiem a puitling chho tawh hle bawk - hliam vanga inlan thei lo hi inlan pawh nise an tan nomawi beiseina a sang bik lem lo khawp ang.

Barakhaih

US Open ṭan hma khan tour­nament a zawh huna hmeichhe singles world number 1 ni thei player pali an awm. Mahse, tournament khelh zawh hnua number 1 chu Garbine Mu­guruza a ni. Wimbledon cham­pion Muguruza hian last 16 paltlang zo lo mah se a elpui ten beisei an phak loh avangin number 4 aṭangin pakhat­naah a kaisang.

Champion tura rinkai ni phak seeded pahnihna Simona Halep leh world numebr 7 Johanna Konta te chu hneh nei loin an tla nghal a, world number 1 hlui Caroline Wozniacki, Angelique Kerber leh Svetlana Kuznetsova te chu second round-ah an tla vek bawk.

Kum 1981 khan hmeichhe singles semifinal-ah khawtual nula pali an inlan ṭhawt a, hemi hnua a vawi khat nan tun ṭumah khan American player pali an inlan leh chiah. Tournament ṭan hmasa rin hlawh lo berte zinga mi, seeded pawh chang phak lo Sloane Stephens kutah nomawi hlan a ni - August thlatir kha chuan Stephen hi world number 957 a ni!

Nakkum lam

Kumin US Open kha a vawi 137-na a ni a, Open era chinah nakkum hi a vawi 50-na tur chiah a ni dawn. Nau neih vanga inlan thei lo Serena Williams a inlan thei tawh tura ngaih a ni a, inelna ropui min hmuihtir fo tawhtu Nadal leh Federer ten hliam nei loa an la khel thei a nih phawt chuan tennis tournament chhinchhiah tlak tak pakhat chu a la ni ang.

US Open hi tennis tour­nament zinga lawmman sum fai tamna ber a ni, kumina singles champion khan $3,700,000 (Rs 23,66,42,750) zet an dawng a ni. ATP leh WTA Tour zinga ngaihhlut ber Grand Slam champion hian world ranking-ah point 2,000 zel an hmuh belh bawk.