Internet hmangin Mizo coach-te inzir

Association of Indian Football Coaches (AIFC) buatsaih, Mizoram football coach-te tana Free Online Workshop on Football Coaching 8 Module chu nimin tlai khan neih chhunzawm zel a ni.

Internet kaltlanga seminar neih 'Webminar'-ah hian Dr Lalzarmawia Khiangte, Mizoram State Sports Council (MSSC)-a Sports Medicine doctor bakah Lalhmangaihi Zote, Sports Nutritionist, MSSC-te'n zirtirna an pe a, Lalnghinglova Hmar, Mizoram Football Association Honorary Secretary leh AIFF Executive Committee member ni bawkin coach-te fuihna thu a sawi bawk.

April 16 khan India rama football coach langsar tak Thangboi Singto hoin  Mizoram football coach-te  hian webminar hi an  lo nei tawh a, nimin khan Shillong Lajong coach hlui hi a tel leh bawk.

India rama football coach intel khawm pawl AIFC hian, Covid-19 hri leng avanga hun âwl chu coach-te'n ṭangkai taka an hman theihna turin he thil hi India ram hmun hrang hrangah an buatsaih a ni.