City midfielder Silva a fimkhur

Monaco aṭanga Man­chester City zawm­tu Ber­nardo Silva chuan a khelhpuite chu Feyenoord dahhniam lo turin a hrilh. Zanin dar 12:15 hian English club hian De Kuip, Rotterdam-ah Feyenoord an hmachhawn dawn.

Group inkhel dangah Shakhtar Donetsk-in an mual Metalist Stadium-ah Napoli an mikhual bawk ang.

Kum 23 mi Bernardo Silva chuan, "Champions League an khelh phak chuan an ṭha tihna a ni. City ang club tan hi chuan nomawi lak theih zawng zawng lak puia beih a ngai a, lak tum miau loh chuan a lak theih loh," tiin tumna a san phawt a ṭul thu a sawi.

Portuguese mid­fielder Silva chuan sawi chhunzawmin, "Cham­pions League hi inelna hlu tak leh danglam tak a ni a, group stage ringawt pawh hi a hlu a, knockout stage hi inelna dang daih a ni bawk. He inelnaa hi chuan ṭhat a ngai a, van­neih a ngai tel bawk," tiin UCL a hmuh dan a sawi.

Feyenoord hian an player pawimawh Danish international striker Nicolai Jorgensen chu kartawpa Heracles nen an inkhelh ṭuma a inhliam avangin an chhawr thei dawn lo. Amaherawhchu, Dutch champion tan Dutch winger pahnih Steven Berghuis leh Jean-Paul Boetius te an che ṭha a, Berghuis hian match liah goal li a khung tawh a, Boetius hian goal thum a khung ve tawh bawk.