West Ham-in point hmu ve ta

Premier League season kal laiah West Ham chuan point an hlawh chhuak ve ta. Thawhṭanni zan khan Hammers hian an mikhual Huddersfield chu 2-0 in an hneh a, kumina an league point hmasa ber a ni.

Slaven Bilic-a'n a zawna match thum chhung a naute a tlawm pui tak avangin a chungah boruak a sang tawh a, an mikhual lakah pawh goal khung loin an thamral leh mai dawn niin a lang hman. Striker thar Javier Hernandez-a'n bar a pet per tih mai lo chu first half chhungin chance ṭha sawi tur an nei lo.

Minute 72-na a ni a, mid­fielder Pedro Obiang-a'n yard 25-a hla aṭanga a ball pet chu defender Mathias Jorgensen-a'n a lo dang pial a, keeper Jonas Lossl tan dan theih a ni lo. Kai thar Huddersfield-in tun season league match-a an goal chhuah hmasa ber a ni. Goal hmahruai a luh aṭanga minute nga hnu lekah substitute Andre Ayew chuan an chak nemnghehna a khung ve bawk.

Bilic a lawm

Kum 49-na piancham lawm­tu Bilic-a'n beisei anga season bul an ṭan ṭhat loh hnua hnehna an chang avangin a lawm thu a sawi. Nipui bazarah Croatian coach hian a player duh William Carvalho, Renato Sanches leh Grzegorz Krychowiak te a lalut thei lo a, hei vang hian club thuneitu lam nen an boruak pawh a sang deuh hman.

Season hmasa aṭanga home ground atana an hman London Stadium-ah result an nei

ṭha tawk lo a, World Athletics Cham­pionship Stadium hluiah hian point an hlawh chhuak hleithei lo a ni - point thum an hmuh takah chuan boruak rit lutuk zualpui a kiang tura beisei a ni.

Hammers coach Bilic chuan, "A zawna vawi thum chak loh hnuah chuan inrintawkna neihsan a harsa hle, hun khirh­khan taka kan awm laia point thum kan hmu thei hi ka lawm takzet a ni. Hnehna kan chan vang chauhin ka lawm a ni satliah lo a, ka naute khelh dan khan mi ti lawm a ni," tiin a sawi.

West Ham tan hian malpui hliam vanga season bul ṭan thei lo Andy Carroll a inkhel thei tawh a, Mexican forward Hernandez chu khelmual sirah tawlhtir a ni. An game hmasa pathum nena khaikhin chuan an goal nawr pawh a na sawt.

Mumang a tawp

Terriers (Huddersfield sawi­na) hian kum 1971-72 hnua avawi khat nan English club-te inelna sang ber an khel a, an match hmasa pathumah vawi hnih chakin Southampton nen an inhnehtawk thung. International break zawha an result duhawm tak hi neih chhunzawm duh mah se Hammers an dang zo lo.

Huddersfield manager David Wagner chuan, "Kan tlar­hnung an thawkrim em em a, amaherawhchu kan inelna hi Premier League a nih miau avangin goal chhuah loa awm reng chu a hrasa a ni. Kan thlen chin hi a chhe lo a, chutihrualin ball kan chan khan huaisen taka kan ken ngam a ngaih chang a awm a, mahse ball ken hun kan thlang thiam tur a ni," tiin a nau ten ball an hloh nasa chu an tuar thu a sawi.