ATK-ah United defender hlui
Manchester United academy chhuak Tom Thorpe chuan Indian Super League khel turin Atletico de Kolkata a zawm. Kum 24 mi defender hian season hman zawh takah khan Bolton Wanderers tan League One-ah a khel a, tunah chuan India lam a rawn hawi ta.
Tom Thorpe hian 2012-13 season a U21 Premier League a vawi khat nana khelh a nih khan Manchester United reserve team tan captain armband a hreng a, champion nomawi a chawipui. United senior team tan eraewh match khat chiah a khel a, a bak a inlan lo.
United-a a awm lai hian Championship club Birmingham City-ah loan-in a chhuak a, 2015-16 season-ah Championship club vek Rotherham United chu a nghetin a zawm. Rotherham-ah hian beisei angin hmun a chang tam lo a, Bradford City leh Bolton Wanderers-ah te loan-a khelhtir a ni.
England tan age level hrang hrangah a inlan tawh a, UEFA European Under-17 Championship-a nomawi an chawi ṭum pawhin squad-ah a tel a, season hman zawh takah khan Bolton tan League One-ah match 21 khela goal khat khungin Championship a invawrhkai pui bawk.