Champions League-ah a vawi khat nan Leipzig inlan dawn

Season hmasa khan RB Leipzig chuan a vawi khat nana Budesliga khelin pahnihna an ni a, Champions League khel turin an tling. Zanin dar 12:15 hian Europe club-te inelna sang bera an match hmasa ber an khel dawn; Red Bull Arena-ah Ligue 1 champion AS Monaco an mikhual ang.

Kum 2009 May thla a din Leip­zig hian sulhnu chhuan tur an la ngah lo. Tuna an player zingah Emil Forsberg, Jean-Kevin Augustin, Bruma leh Kevin Kampl te chiah hi Champions League tawnhriat nei an la ni. Monaco erawh season hmasa quarterfinal thleng thei an ni thung.

Leipzig hian an vawi khat khelh­­na tur ni mah se tun season an khelh chhoh dan ngaihtuahin an ngaihtuahawm hran lo ang. Liverpool player ni mai tur Naby Keita an nei a, kum 22 mi midfielder hian hliam tenau a neih avangin a dinhmun a chiang thei rih lo thung.

Season kal laia Bundesliga hmatawng sawi hlawh ber pakhat Timo Werner hi Monaco tlarhnung chhaih buai thei tur a ni bawk. Germany international hian tun season-ah a club tan match li khelin goal li a khung tawh a, a vanglai a hmang chho mek.

Zanin hian Champions League group B ten an match hmasa ber an khel kim dawn, Portuguese club FC Porto chuan Turkish club ṭha Besiktas an mikhual ve bawk ang.