India nula ten nuai 20 tuak chhuak

India hmeichhe hockey team chuan coronavirus vanga ṭanpui ngaite ṭanpui nan sum an tuak a, April 17 aṭanga May 3 thleng khan Rs 20,01,130 an tuak chhuak hman; an sum hmuh hi ei tur nei lo leh mi harsate tan sem chhuah a ni.

Hockey player-te hian an mahni awmhmuna an taksa sawi zawi lai thlalak leh video chu social media lamah an tarlang ṭhin, an ṭhiante leh fans chu Rs 100 tal thawh turin an ngen a, inkharkhip hunawl hman ṭhat pahin hna an thawk.

Mizo nula Lalremsiami Hmar chuan, "A tirah chuan nuai nga tuak kan tum, kan thil tum hi ni sarih chhung lekin kan tlin. A hnu lamah mi inphalte a zarah nuai 20 chuang kan thawk chhuak thei a ni.

"Midang ṭanpui tura tha thawhtute zawng zawng chungah kan lawm, a let tam takin Pathian malsawmna an dawn ngei pawh ka beisei," tiin Vanglaini a hrilh. Mizo zingah pawh sum thawh hi an awm nual, March thla khan Hockey India chuan hri leng do nan nuai 75 a lo thawh tawh bawk.

India nulate hi Tokyo Olympic khel turin an in vaw tling tawh, infiamna khawmpui lian hi hri leng vangin kuminah neih theih a ni lo. Nakkum atan sawn a ni a, inbuatsaihna hun an neih rei phah.