Turin khawpuiah Ronaldo a kir

Juventus forward Cristiano Ronaldo chu Thawhṭanni khan Italy rama Turin khawpuiah a kir leh tawh a, a thlen aṭanga ni 14 chhung chu khung hran leh rih phawt a ni ang.

March 8 khan Ronaldo hi an ram Portugal-ah a haw, a nu Dolores Aveiro-i chu stroke vangin Madeira-ah enkawl a ni a, a hmunah hian a va tlawh. A haw tuk aṭang maiin Italian football chu coronavirus vanga chawlh lailawk chhunzawm a ni.

Portugal-ah hian a bialnu leh a fate nen hun an hmang, tun hnaiah Italy sorkar chuan inkharkhipna ṭhenkhat a thlah dul. Juventus player-te pawh mimal training an nei thei tawh dawn, forward Ronaldo pawh a hna ngai thawk tur hian a mimal thlawhtheihna hmangin a kir.

Kum 35 mi Ronaldo-a'n match pangngai a khelh hnuhnung ber chu March thlatir lama Inter Milan 2-0 a an hneh kha a ni, Serie A match an khelh hnuhnung lamah hian a hmuna entu fans pawh an awm thei tawh lo.

In lama hun a hman chhungin Ronaldo hian a taksa a sawi zawi reng a, social media lamah a hun hman dan hi a pholang fo a, hri leng laka fimkhur tur leh midang ṭanpui turin zirtirna a nei 

ṭhin bawk.

Italy ramah hian May 18 aṭangin club ten training an nei thei tawh dawn, tun karah pawh hian ram bung/peng ṭhenkhatah chuan training nei ṭan pawh an awm tawh - Serie A club duh dan angin season kal lai khelh zawh theih an beisei mek a ni.

Juventus player zingah pathum chuan Covid-19 an kai tih hriat a ni a, tunah erawh an dam tawh. Thawhṭanni khan player ṭhenkhat chu coronavirus an kai em tih enfiah an ni, player dang pawh Turin an thlen hnua endik leh zel an ni ang.

Turin club hian training pangngai la nei thei lo mah se - Federico Bernardeschi, Juan Cuadrado, Carlo Pinsoglio, Leonardo Bonucci leh Aaron Ramsey te chu an kir leh tawh, an vai hian hmai tuamna (mask) an vuah vek niin media lam chuan an tarlang.

Dutch centre back Matthijs de Ligt leh midfielder Blaise Matuidi te chu an la kir lo, France international hi hri leng a kai hnuah an ram lamah inenkawlin a awm mek. A nu damlohna vanga Argentina lama haw Gonzalo Higuain pawh club lamah a la kir lo.

Juventus hian an elpui Lazio lakah point khatin hma an hruai mek, tun hnaiah a zawna a vawi kua (9) nan scudetto (Serie A nomawi) chawi leh an tum mek.