Vawiin tlai 5:30-ah Chanmari Vs Police

July thla tawp khan Chanmari FC-in Rajiv Gandhi Stadium-ah Mizoram Police 4-0 in an sawp a, vawiin tlai dar 5:30-ah sulhnu nei ṭha team pahnih hi Lammualah an intawng leh ang.

Mizoram Premier League Season 6-ah team pariatin match hnih ṭheuh an khel tawh a, Chanmari FC-in chak loh an la nei lo a, Police-in chak an la nei lo thung. H. Vanlalthlanga leh Ṭialthawnga hoten point thum hmuh tumin Lammual an pan dawn a, attacking football en tur a awm ang.

Valpuia Vs Alex
MPL-ah Mizoram Police striker F. Lalrinpuia'n sulhnu a nei ṭha tawh hle. Republic Veng tlangval hian MPL4-ah Aizawl FC tan khelin top scorer, best player leh best for­ward chawimawina a hui vek a, MPL hmasa berah best forward-ah thlan a ni tawh bawk.

Valpuia hian tun season match hnih khelh tawhah goal khat ve ve a khung a, MPL hrim hrimah Police striker hian season liam ta a khel lo chungin goal 33 tehmeuh a khung tawh. Chanmari FC tlarhnung tan Police striker Valpuia ven uluk a ṭul dawn a, Republic Veng tlangval thlawp tura Lalfakzuala a rawn let tawh dawn bakah Lalbiakhlua leh Lalsangbera te an neih sa avangin coach Thlanga tan an tlarhnung rem phui a ṭul ang.

Chanmari forward Alex Whittemore hi Aizawl FC an khelhpui ṭumin a inlan ṭan a, Lammual pan chhan tlak striker a ni. Liberian striker Alex hian MPL-ah goal la khung lo mah se defender la peng turin tharum a nei a, ball pawh a thiam a, awmze neia inkhelh a thiam avangin thlah thlam a thiang lo ang.

I League champion an hmachhawn ṭumin Alex hi uluk taka ven a nih avangin goal attempt a ngah lo a, tlarhnung phui ṭha lo Police lakah eng nge a theihna chiah fiahin a awm dawn a, a en tlak khawp ang.

Chak tum ve ve
Chanmari FC coach H. Van­lal­thlanga chuan, "Kan player neih dan anga khelh a ṭul ṭhin a, keini chu ball timuang thei kan ni lo. Goal khung tumin kan nawr ang," tiin chak a tum thu Vanglaini a hrilh.

Chanmarians hian inhliam vangin keeper Lalmuanawma leh Lalmuanzova te an chhawr thei dawn lo a, hrem vangin Jakob Vanlalhlimpuia a la inlan thei dawn lo. Amaherawhchu inhliam vanga Aizawl FC hmachhawn thei lo Chanmari fapa rangkachak Rochhingpuia a dam tawh thung.

Mizoram Police coach Ṭial­thawnga chuan, "Kan naute hi tawnhriat inang lo tak tak te an ni a, player ṭhenkhat Mizoram rinrawl ber an nih tawh laiin a ṭhen erawh MPL an vawi khat khelhna te an ni hlawm. Tuna inkar zau tak hi a zim tial tial a, kan ṭha chho zel ang. Chak ngei tumin kan khel dawn," tiin chak an tum thu a sawi ve bawk.