United tan point 3 leh goal 3

Manchester United-in Jose Mourinho hnuaia Champions League an khelh hmasak berah FC Basel 3-0 in an sawp a, Group A inkhel dangah CSKA Moscow-in mualneitu Ben­fica 2-1 in an lehthal bawk.

Old Trafford-ah in­hliam vangin Paul Pog­ba chu minute 19-na lek­ah thlak ngai mah se French midfielder thlaktu Marouane Fellaini a khel ṭha a. Belgian midfielder Fellaini hian minute 35-naah goal hmahruai khungin Romelu Lukaku leh substitute Marcus Rashford ten second half-ah an khung belh leh bawk.

Point thum hmuh vangin Mourinho a lawm a, amaherawhchu an khelh danah erawh Portuguese manager a lawm tluan tling lo. United manager chuan, "Goal hniha hma kan hruai thleng kha chuan nghet charhin kan khel a, khami hnu kha chuan nuam kan tih danin kan khel a, games ang maiin thil ṭul lo tak tak tih kan tum a ni. Khatiang vang khan kan vanduai phah thei a, kan khingpuite kan zah a ṭul bawk," tiin a sawi.

Pogba inhliam chung­chang sawiin Mou­rinho chuan, "Ka tawnhriat aṭang­in tihrawl na tih chu ka hria a, ka tawnhriat aṭang vekin kar engemaw chhung chu a chawlh a ṭul ang tih a hriat theih bawk," tiin French midfielder in­hliam chungchang a sawi.

United hian Pathian­niah Everton an mikhual dawn a, Mourinho chuan, "Squad kan neih chhah chhan hi tun hun atan a ni. Player-in inhliam hun an nei a, hrem tawh chang te a awm. Pathianniah Paul hi awm ta lo pawh ni se Her­rera, Carrick, Fellaini leh Matic te kan nei a, buaina tur a awm lo," tiin an squad a chhah ṭhat thu a sawi.