Zan lamah Aizawl veng lian Chanmari West Vs Ramhlun North

Mizoram Premier League Season 6-ah Chanmari West FC-in point an la hmu lo, Ramhlun North-in an match hnuhnung berah Dinthar FC an hneh thung. Aizawl veng lian pahnih hi zanin dar 8:00-ah Lammualah an inkhel dawn a, entu ṭhahnem tak an pungkhawm tura ngaih a ni.

Inhrechiang

Chanmari West coach HC Zarzoliana hi kumin CYMA Foot­ball-a Ramhlun South champion puitu coach a ni a, he team-ah hian Ramhlun North coach Samson Ramengmawia chu player a ni.

Chanmari West-ah hian coach Zara bakah Ramhlun South tana khel an awm nual avangin Samson-a'n a khingpui tur team hi a hrechiang a, Shillong Lajong captain hlui Samson-a hian I League club lama a awmpui ṭhin Lalramluaha leh Jacob Lalrawngbawla te theihna a hrechiang bawk.

Game plan chu

West Warrior-in ball pet thiam Jacob-a an hmang thiam a, Lajong midfielder hlui hi MFA Super Cup final an thlen theihna kawngah pawh player pawimawh a ni.

Ramhlun North coach Sam­son-a chuan, "Jacob-a hi kan dan a

ṭul a, ball pet thei loa kan siam a ngai a ni. Ramluaha lo let leh hi ka lawm a, a chawlh rei tawh deuh avangin match fitness la nei rih lo mah se theihna sang tak a neih avangin a

ṭhatna kan hmu chho zel ang," tiin a khingpuite chungchang a sawi.

Chanmari West coach Zara chuan, "Football hi 11 a khelh a ni a, pakhat dan vanga buaina tur a awm lo. Kan tana pawimawh ber zawk chu point a ni a, chak tumin kan khelh a ṭul. A zawna vawi thum chak loh chu a dik lo," tiin an theihna zawng zawng an chhuah tur thu a sawi.

Mipui an hlu

Ṭantu nei ṭha ṭhin West War­rior-in result an neih ṭhat tawk loh avangin Chanmari West mipui Lammualah an inthlahrung a, amaherawhchu mipui an thawhchhuah ṭhat loh chuan khelmuala an result thlenga a nghawng avangin huaisen takin an hmaa awm an tawn tlang a pawimawh.

Ramhlun North erawhin ṭantu an ngah dawn. Dinthar FC an hneh ṭumin Ramhlun North ṭantute thawm a ṭha a, zaninah pawh a danglam lo ang.