Chelsea tan Champions League a awlsam

Premier League champion Chelsea tan Champions League-a an match hmasa berah harsatna a awm lo - an mikhual FK Qarabag chu 6-0 ngawtin an sawp a, Azerbaijan Premier League champion tan English champion meuh chu an sang 'lua' a ni.

Chelsea tan Davide Zappa­costa chuan 90 minute a khelh hmasak berah goal ropui a khung nghal a, Pedro, Cesar Az­pilicueta leh Tiemoue Bakayoko ten goal khat ṭheuh an thawh ve bawk. Michy Batshuayi-a'n goal hnih a khung a, Blues tana a hun ṭha neih khawhral mai mai a tum lo tih a pholang.

Chelsea = Goal

Inkhel ṭan aṭanga mi­nute ngana lekah Chel­sea-in goal hmahruai an khung nghal a, vengtu nei lo Pedro-a'n a duhna hmunah tak ball a dah - Stamford Bridge-ah Blues-in goal an sur tir dawn tih a rin theih. Minute 30-naah pound maktaduai 23-a Blues zawmtu Zappacosta-a'n mual ding lam sir aṭangin ball a khalh tlang a, goal kil sirah ropui zetin a khung.

Blues-in an la duhtawk lo cheu. Cesc Fabregas ball siam ṭha zet chu Azpilicueta-a'n a tauh lut a, Bakayoko-a'n hnai set sawt aṭanga a chhunzawm hnuah Batshuayi chuan goal hnih dang a khung zui bawk. Chelsea tan phul hlut erawh a la hun lo, an group-ah hian AS Roma leh Atletico Madrid an la awm tlat! Club pahnih hi Group C inkhel dangah goal khung loin an inhnehtawk.

Conte thukhawchang

Chelsea boss Conte chuan, "Kan game hma­sa berah goal tam tak khunga goal chhuah loin hnehna kan chang a, chan­chin duhawm hlir a ni," a ti a, player sik­­sawi chungchangah, "Cham­pions League-ah ka khelhtir a nih chuan ka naute hi ka ringtawk tihna a ni a, thu mai ni loin thiltih hmangin ka player zawng zawng ka ringtawk tih ka pholang a ni," a ti.

Blues player langsar zingah Alvaro Morata leh David Luiz chuan bench-ah hun an hmang tluan a, bench aṭangin Bakayoko leh Eden Hazard-te an tlanlut bawk. Chelsea hian Pathianni zan khian league match khel turin Arsenal an mikhual dawn.