PSG-in Celtic mualah goal surtir
Champions League nomawi duh avanga player lei nana sum hmang hnem Paris St-Germain chuan a lo thlawnin sum an hmang lo tih an lantir. Thawhlehni zan khan French club hian Celtic chu khualmualah 5-0 in an luhchhuah. Group B inkhel dangah Bayern Munich chuan an mikhual Anderlecht 3-0 in an sawp ve bawk.
Khawvela footballer manto ber Neymar-a'n minute 19-na lekah a ke ding lamin a thiam dan takin cool zetin goal hmahruai a khung a, rawlthar Kylian Mbappe-a'n a khung chhunzawm bakah striker Edinson Cavani chuan goal hnih a belh - goal khat dang hi Celtic defender Mikael Lustig-a'n an mahni lama a tihluh palh a ni.
Celtic hian European football-ah club lian ṭhenkhat an mikhual fo tawh a, tun ṭum ang em em a chak loh nasat hi an la nei ngai lo. Scottish club hian Champions League group stage match hmasa berah hnehna an la chan ngai loh record chu an thai bo thei rih lo.
Hmel thar
Celtic Park-a inkhelah Unai Emery-a'n attacking game khel turin a naute a remkhawm. Tlarhmaah Cavani a mal tlat a, a thlawp turin Neymar leh Mbappe te a sirah an awm. Forward pathum hnungah hian Adrien Rabiot, Thiago Motta leh Marco Verratti te an awm bawk a ni.
Barcelona forward hlui Neymar-a'n pound maktaduai 200 man a nih zia lantir nan Cavani ball pek chu box chhunga a lakluh hnuah buaina nei loin a khung. Barzil captain hian Catalan club tan a khelh laiin Celtic lakah hian goal li a khung tawh bawk.
Kum 25 mi Neymar hian season hmasa Monaco champion puitu Mbappe goal khung tur a siamsak zui bawk. Kum 18 mi Mbappe hi kum 20 tlin hmaa Champions League-ah club pahnih tana goal khung thei hmasa ber niin goal khung hnem ber Patrick Kluivert nen an record (7 goals) an in ang chiah, record thar siam theihna hun a nei ṭha hle.
Zlatan Ibrahimovic a chhuah aṭanga PSG hmatawng langsar ber chu Cavani a nih chhunzawm zel. Uruguay international striker hian PSG tana Champions League inelna bika goal khung hnem ber (22 goals) ni turin penalty a chhuih luh bakah Layvin Kurzawa-a cross chu kil zet aṭangin a tauh lut bawk.
PSG hian minute 90 chhung inkhel an thunun a, Rabiot thlaktu Julian Draxler-a'n inkhel bul ṭantu nih a phu zia a lantir. Germany international hian Celtic tlarhnung a rum ṭhaih fo a, tlarhma lama awm Neymar leh Cavani tan ball hlauhawm a thawn lut fo bawk - PSG tlarhma hi eng club tan pawh dan huphurhawm tak an ni pha tawh ang.
Eng nge an sawi?
PSG manager Unai Emery chuan, "Club hian hmasawn turin nipui bazarah sum a hmang hnem a, tuna kan tih theih chu hmasawn tura thawhrim zel a ni. Khualmuala hetiang kan khelh theih avang hian ka lawm, hun harsa kan tawn hunah inrintawkna kan neih phah dawn a ni. Kan tlarhma lam an khel ṭha a, chutih rualin hmasawnna tur a la awm bawk," tiin a sawi.
Celtic manager Brendan Rodgers chuan, "Kum 12 hnuai lam inkhel ang chauh kan ni. Inelna sangah chuan ball vawi khat hloh pawh a pawi a, tihsual kan ngah bakah kan tihsual siamṭha turin kan thawkrim tawk lo bawk. Club
ṭha lakah kan chak lo a ni a, kan vanneih ni chu ni se goal khat tal khung ve tur kan ni," a ti.
Bayern an lian
Hoffenheim hneh lo hlim Bayern Munich an chelsual nawn lo. Allianz Arena-ah Anderlecht midfielder Sven Kums chu Robert Lewandowski a tihtluk avangin hnawhchhuah a ni a, penalty a chawi bawk. Poland international striker Lewandowski hian goal-a a chantir bakah Thiago Alcantara leh Joshua Kimmich ten an khung belh bawk.
Malpui hliam vanga season bul ṭan thei lo Jerome Boateng-a'n a match hmasa ber a kel thei tawh. Germany international defender hian tlarhnung a phuarkhawm ṭhat bakah hun tawp dawna Kimmich goal khung tur a siamsak bawk a ni.
Bayern tan hian senior player Franck Ribery-a'n inkhel bul a ṭan a, France international hlui hi minute 78-naah Thomas Muller-a'n a rawn thlak. Kum 34 mi Ribery hi thlak a nih avangin a lungawi lo a, a lungawi lohna a lantir zui bawk.
Bayern Munich manager Carlo Ancelotti chuan, "Ka thutlukna hi a chang chuan an hrethiam lo ṭhin reng a ni. Player ṭhenkhat chu an khelh chhiat vang ni loin thlak an ngai fo, inkhel kan thunun a, chak tura ngaih kan nih tawh avangin player senior tan chawlhna hun siamsak kha a ṭha a ni," a ti.
Thawhlehni Zan Inkhel Results
Benfica 1 - 2 CSKA Moscow
Manchester United 3 - 0 Basel
Bayern Munich 3 - 0 Anderlecht
Celtic 0 - 5 PSG
Chelsea 6 - 0 Qarabag
Roma 0 - 0 Atletico Madrid
Barcelona 3 - 0 Juventus
Olympiakos 2 - 3 Sporting Lisbon