Messi hmaah Buffon a zawr

Barcelona-in Juventus laka hnehna chang turin harsatna an tawk lo - season hmasa Champions League finalist hi Thawh­lehni zan khan 3-0 in an sawp a, Nou Camp-ah Barcelona fans an lam.

Gianluigi Buffon nen an intawn hmasak vawi thumah Messi-a'n Italian goalkeeper ropui lakah goal a khung thei ngai lo a, Thawhlehni zanah erawh thawnthu thar ziahin a awm - Argentine forward hian Buffon lakah goal hnih a khung a, Ivan Rakitic chuan goal khat a thawh ve bawk.

Chhandamtu Messi

Barcelona tan minute 45-na lekah Lionel Messi-a'n goal hmahruai a khung a, Luis Suarez nen mawi zeta an in one-two hnuah he goal hi a lut - Neymar tel loin an buai lo. Line aṭanga Messi ball pet petchhuah a nih hnuah Rakitic-a'n an goal hnihna a pet lut a, Messi-a'n yard 20 vela hla aṭangin mawi zetin an goal hnihna a pet lut leh bawk.

Juventus goalkeeper Gianluigi Buffon tan theihnghilh daih tlak match ni mah se mellung pawimawh erawh a phun tho - Italian player zinga Champions League match khel hnem ber niin vawi 109 a inlan a, Paolo Maldini nen an intluk. Maldini record hi a khum ngei a rinawm.

Valverde a hlim

Barcelona coach Ernesto Valverde chuan, "Khelmual chhungah Lionel Messi i nei a nih chuan thil ropui tak a thleng dawn tih a chiang nghal ṭhin. Club dang coach ka nih lai khan Messi hian min hrem nasa ṭhin em em a, mah se tunah chuan a ṭhatna hi ka hlimpui ve thei ta. Game-ah khan a inrawlh kim vel vek a ni," tiin a player a chhuang hle.

Group D inkhel dang­ah Sporting Lison chuan 3-2 in Olympiakos an hneh ve bawk. Sporting hian first half chhungin Seydou Doumbia, Gelson Martins leh Bruno Fer­nandes hmangin first half-ah goal thum an khung a, substitute Felipe Pardo-a'n second half-ah Greek club tan goal hnih khung ve mah se an harhchhuah a tlai avangin 3-2 in an tlawm ta tho.