Crystal Palace manager thar Hodgson

England manager hlui Roy Hodgson chu Crystal Palace manager thar ni turin lakluh a ni a, kum 70 mi manager hian Selhurst Park-ah kum hnih chhung hun hmang turin contract a ziak.

Palace hian beiseina sang tak nen Frank de Boer hnuaiah season bul ṭan mah se Dutch manager enkawlna hnuaiah match nga khelin chak hmel an hmu lo a, Inter Milan boss hlui hi ni 77 hnuah a hna aṭanga banin Hodgson hi an lalut ta a ni.

Liverpool boss pawh lo ni tawh Hodgson hian Euro 2016-a a kaihhruai England-in last 16-a Iceland an ngam loh hnuah hna a bansan a, England a chhuahsan hnuah club enkawl nei loin a awm reng a ni. Three Lions (England sawina)-a a assistant Ray Lewington chuan a pu hi Palace-ah hian a zui bawk ang.

Player a nih laia Palace aṭanga a career

ṭantu Hodgson chuan, "Ka naupan lai aṭanga ka club lo ni tawh enkawl hna ka thawk thei tur hi ka lawm takzet a, ka tan chuan chawimawina ropui tak a ni," a ti.

Season hman zawh taka A League club Melbourne City-a consultant hna thawktu coach hi Palace-in an manager atana an lakluh hian kum 70 leh ni 34-a upa a ni a, Premier League club enkawl tura a ngheta lakluh zinga upa ber a ni.

Hodgson hian kum 40 chuan football management lamah a hun a hmang tawh a, kum 2010 khan Fulham chu Europa League final hial a hruai thleng. Euro 2012-ah England chu quarterfinal a hruai thleng a, mah se kum hnih hnuah kum 1958 hnua a vawi khat nan World Cup group stage aṭanga hnawhchhuah an ni thung.