Vawiinah World Cup ticket zuar dawn

Russia-a khelh tur FIFA 2018 World Cup ticket chu vawiin hian zawrhchhuah ṭan a ni dawn. Fan-te chuan ticket lei tur hian FIFA website kaltlangin application an thehlut ang a, ticket zawrhchhuah dan tur hi phase hniha ṭhen tur a ni.

World Cup enna atana ticket man tlawm ber hi £79 (Rs.6,728) a ni dawn a, hei hi group match ennaa man tlawm ber tur a ni. Russia rama World Cup final en duh tan erawh £829 (Rs.70,611) sen a ngai thung. Hetihlai hian World Cup thlengtu nih manah Russia khua leh tui te an vannei dawn a, Russian mi tan ticket man tlawm ber chu £17 (Rs. 1,448) in a lei theih ang.

Russia-a World Cup final enna man zat tur leh ticket manto ber £829 hi Brazil World Cup 2014-a Rio de Janeiro-a final enna man zat aia a tona zawk chu £151 (Rs. 12,861) zet a ni.

Phase hmasa ber, October 12, 2017 hmaa ticket lei dilna thehlutte chu ticket awm zat aia tam diltu an awm chuan draw hmanga application hi thliar hran leh tur a ni. Ticket lei diltute chu November 16, 2017 hmain an application pawm a nih leh nih loh hrilhfiah tur an ni bawk.

November 16 - November 28 inkarah phase hmasa bera ticket zawrchhuah hun hi neih a ni ang a, dilna thehlut hmasa apiang kha duhsak tur a ni. December 5-ah phase hnihna neih leh tur a ni dawn a, April 18 - July 15 inkarah 'last minute' sale an tih chu an nei leh dawn bawk.

Russia rama World Cup khelh tur hi Luzhniki Stadium, Moscow-ah khelh ṭan a ni dawn a, tun dinhmunah a thlengtu Russia tih lohah ram pasarih chu World Cup khel tura tling chiang tawh niin Brazil, Belgium, Iran, Mexico, Japan, Saudi Arabia leh South Korea te chu tling tawh an ni.