Europa League-ah Arsene hoin Arsenal inlan dawn
Arsenal manager Arsene Wenger-a'n season hmasa khan a naute chu Premier League-ah pangana a nih pui a, an tan Champions League-ah hmun a awm lo. Wenger-a'n a enkawl hnua a vawi khat nan Gunners chuan zanin hian Europa League an khel dawn - dar 12:35 hian Emirates Stadium-ah Cologne an mikhual ang.
Premier League club zingah Everton chu Greek club Atalanta khelmualah an lenglut bawk ang. Ronald Koeman-a enkawl Everton hian nipui bazarah sum an hmang hnem a, beisei an nei sang. Atalanta hian tun hmain English club an la hmachhawn ngai lo a, an intawn hmasak berah hnehna nena bul ṭan an duh dawn.
League a pawimawh?
Arsenal manager Wenger-a'n, "Europa League hi kan ngai pawimawh a, amaherawhchu kan ngaih pawimawh ber erawh Premier League a ni. A pahnih hian ṭha taka kan khelh theih nan kan insiamrem thiam a pawimawh ang," a ti. Wenger hian a thusawi dan
aṭang chuan player ṭha ṭhenkhat a chawlhtir a rinawm.
Season kal mekah Wenger-a'n tlarhma lamah Alexandre Lacazette leh Danny Welbeck te a chhawr ṭhin a, zaninah erawh Theo Walcott leh Olivier Giroud ten tun season-a a vawi khat nan inkhel bul an ṭan rin a ni. Chile international Alexis Sanchez leh Jack Wilshere te pawh inkhel tura beisei an ni bawk.
Wenger hian Premier League lama an hmel kan hmuh tam loh Per Mertesacker, Alex Iwobi, Mohamed Elneny, David Ospina, Calum Chambers leh Reiss Nelson bakah season hmasa lam pawha khel mumal tawh lo Mathieu Debuchy te chu khelhna hun siamsak a duh thu a sawi.
Kum 67 mi Wenger chuan, "Ningani zana inkhelh chuan kartawpa legaue khelh nen a chawpchilh em em a, ngaihtuahna sen thiam a ngai zual dawn. Chutih rualin kan khelmuala inkhel tur kan nih avangin hnehna chan ngei kan tum," tiin a sawi.
Chelsea tana a khelh laia Europe League champion ni tawh keeper Petr Cech chuan, "He inelna hi ngaihnep ngawt theih a ni lo a, kan theihna zawng zawng kan hmang tho tur a ni. Inelna dang nena kan khelh dan erawh a inang lo ang tih ka ring," tiin a sawi ve bawk.
Arsenal hian Pathianni zan dar 6:00-ah Premier League champion lai Chelsea an lenchilh leh nghal dawn avangin an player ṭha tam zawk an chawlhtir a nih pawhin a mak lo ang.
Rinkai Arsenal
Bundesliga club Cologne-in tun hnai season 14 chhunga an bul ṭan chhiat ber ṭum an tawng mek. Cologne hian league match thum khelh tawhah an la tlawm vek a, goal sarih chhuahin goal khat bak an la khung ve lo.
Cologne coach Peter Stoger chuan, "Rinkai kan ni lo zawk tih chu a chiang reng, Arsenal khelmualah hian result ṭha kan nei a nih erawh chuan league lamah pawh boruak ṭha kan neih chhunzawm theihna hmanrua a nih ngei ka beisei," tiin a sawi.
Season hmasa Bundesliga pathumna hian nipui transfer lai khan an club top scorer Anthony Modeste leh Tianjin Quanjian te an chan a, player dang erawh an squad pangngai kha an la ni. Chinese Super League zawmtu Modeste awm loh hnuah goal hmaa an hriam tawk lo, Gunners tlarhnung su hawng tur chuan thawhhona ṭha an mamawh ang.
Cologne captain Matthias Lehmann chuan, "Kan dinhmun hi chhe tak anga sawi theih a ni a, kan nihna hi kan hriatchian a ngai. Arsenal lakah hian hnehna chang tur chuan ball chan tam ringawt a tawk dawn lo, a na thei ang berin an goal kan nawr a ngai dawn a ni," tiin Bundesliga-ah goal khat chiah an la khung avanga a mangan thu a sawi.
Europa League Group Stage
Zanin Inkhel Tur
Arsenal 12:35 AM Cologne
Atalanta 10:30 PM Everton
Austria Wien 10:30 PM Milan
Villarreal 10:30 PM Astana
Slavia Praha 10:30 PM Maccabi Tel Aviv
Dynamo Kyiv 10:30 PM Skenderbeu Korce
Young Boys 10:30 PM Partizan
Rijeka 10:30 PM AEK Athens
Apollon 10:30 PM Olympique Lyonnais
Hoffenheim 10:30 PM Sporting Braga
Istanbul Basaksehir 10:30 PM Ludogorets
Zlin 10:30 PM Sheriff
Copenhagen 10:30 PM Lokomotiv Moscow
Hapoel Be'er Sheva 12:35 AM Lugano
FCSB 12:35 AM Viktoria Plzen
Zorya 12:35 AM Ostersunds FK
Hertha BSC 12:35 AM Athletic Bilbao
Crvena Zvezda 12:35 AM BATE
Marseille 12:35 AM Konyaspor
Vitoria Guimaraes 12:35 AM Salzburg
Zulte-Waregem 12:35 AM Nice
Vitesse 12:35 AM Lazio
Vardar 12:35 AM Zenit
Real Sociedad 12:35 AM Rosenborg