Bengaluru FC tan AFC Cup final a hnai

Indian Super League club thar Bengaluru FC chuan nimin khan AFC Cup-a Inter-Zonal semifinal-ah North Korean club April 25 SC chu goal khung loin an inhnehtawkpui a, inkhel hmasaah 3-0 a hnehna an lo chan tawh avangin Inter-Zonal final an lut.

Bangalore club hian Interp-Zonal final-ah hian hnehna an chang a nih chuan AFC Cup final an lut dawn a, Europa League tlukpui inelnaah a zawna final lut turin an dinhmun a ṭha tawh hle.

Bengaluru ngai

Bangalore khawpuia club pahnih an inhmachhawn ṭumin Albert Roca-a'n 4-3-3 formation hmangin North Korean club a hmachhawn a, Mizo tan hmun a awm lo. Spanish coach hian an mikhualna ramah pawh hian a formation ngai hmanga player pangngai rin a thlang a, a tifuh.

Indian goalkeeper ṭhangduang Gurpreet Singh Sandhu-a'n si ban a nghak a, tlarhnungah Nishu Kumar, Juanan, Rahul Bheke leh Harmanjot Khabra inkawp tir an ni. Erik Paartalu, Dimas Delgado leh Lenny Rodrigues te chu khelmual laiah dah an ni a, tlarhmaa nawr turin Udanta Singh, Sunil Chhetri leh Toni Dovale an awm bawk.

Gurpreet hming a mawi

Hun tawp nan minute 15 chiah a awm tawh tihin April 25 SC-in goal khung theihna remchang an nei a, penalty pek an ni. Mahse, India international Gurpreet Singh Sandhu-a'n si ban a nghak miau a, Punjabi goalkeeper hian penalty a dang.

North Korean club-in an hun neih ṭhat ber an chhawr theih loh miau avangin goal dang an khung thei tawh lo a, Bengaluru an chak. Sree Kanteerava stadium-a club pahnih intawn hmasak ṭum khan Bengaluru hian Chhetri, Udanta leh Lenny Rodrigues hmangin goal thum an khung a, hei hi an chakpui ta a ni.

Hmabak

Bengaluru FC-in season hmasaah Indian club zinga AFC Cup final lut hmasa ber dinhmun an lo luah tawh a, a zawna final lut turin club pakhat chiah an hmaah an ding ta. Albert Roca naute hian Inter Zone playoff semifinal lehlama Philippines club ṭha Ceres Negros 5-1 zeta sawptu FC Istikol an hmachhawn ang.

September 27-ah Bengaluru hian Tajik League champion lai hi an lenchilh ang a, October 18-ah Bangalore khawpuiah an mikhual ve leh thung ang - Tajikistan club hi 2015-a AFC Cup final lo khel ve tawh tho an ni.