Rafael Nadal beisei sangtu Moya

Carlos Moya chuan tun dinhmuna Rafael Nadal khelh dan enin hun rei tak chhung ṭha taka a la inkhelh theih a beisei thu a sawi chhuak. Nadal hian Pathianni zan khan a vawi thum nan US Open nomawi a chawi.

Grand Slam vawi 14 champion tawh Nadal leh a coach nilai Toni Nadal te chu tennis court chhungah tun season chhung bak an thawkdun tawh dawn lo a, tuna a coaching staff zinga pakhat Moya hi season thar aṭang chuan coach pangngai a ni tawh ang.

Moya chuan, "Rafa hian hliam nei lo se, hrisel taka a inkhel thei a nih ngat chuan khawvela a ṭha ber a ni reng thei ang. Kum naupangte a nih lai aṭang tawh khan thil danglam bik a ti thei tawh a, tunah chuan tawnhriat a ngah tawh bawkin court chhungah a puitling tawh takzet a ni," tiin Nadal a dah sang hle.

Kum 31 mi Nadal hi a khup leh banrek na vangin season hmasa lam khan a inkhel mumal lo a, a inkhelh chhunah pawh beisei a phak lo hle. Kuminah erawh hliam nei loin a khel a, Grand Slam pali zinga pahnih French leh US Open nomawi a chawi thei a ni.