Netherlands leh Belgium an chak

UEFA Nations League, League A Group 4 inkhelah Netherlands leh Belgium ten hnehna an chang ve ve a, team pahnihin finals luh beiseina an la nei zel.

Netherlands hian an mikhualna ramah Poland chu 2-0 in an hneh a, Cody Gakpo leh Steven Bergwijn ten goal khat ve ve an khung - Poland-in European striker 'hot' ber pawl Robert Lewandowski nei mah se a chhanletna tur an nei lo.

Group A4 inkhel dangah Belgium chuan 2-1 in Wales an hneh ve bawk a, finals luh beiseina an la chhi nung - Kevin de Bruyne leh Michy Batshuayi ten first half chhungin goal khat ve ve an khung a, 2-0 a ni.

Wales-in Kieffer Moore hmangin second half-ah si phurh an sut ṭhen a, minute 64-naah bench-a ṭhuttir Gareth Bale chu luhtir mah se goal dang an khung thei tawh lo a, 2-1 in Belgium an chak.

Pathianni zan dar 12:15-ah Netherlands leh Belgium hi an intawng leh dawn a, Louis van Gaal-a enkawl Netherlands tan finals lut turin point khat hlawh chhuah a tawk.

Netherlands hian match nga an khelhah vawi li hnehna an chang tawh a, Belgium nen an intawn hmasakah 4-1 a an chak avangin Pathianni zanah pawh beiseina an nei sang viauin a rinawm.

Hetihlai hian League B lama tla thla thei dinhmunah Wales leh Poland an ding mek - team pahnih hi Pathianni zan dar 12:15-ah vek an intawng dawn a, goal difference-a ṭha zawk Wales hian hnehna an chan chuan an him ang.

Nations League
September 23, Zirtawpni Zan (Result kan hre hman lo)
League A - Group 3
Germany 12:15 AM Hungary
Italy 12:15 AM England

September 22, Ningani Zan
League A - Group 1
Croatia 2 - 1 Denmark
CRO: Borna Sosa 49';
Lovro Majer 79'
DEN: Christian Eriksen 77'

France 2 - 0 Austria
FRA: Kylian Mbappé 56';
Olivier Giroud 65'