Chhinga Veng leh Electric Veng an inhnehtawk

Zote Honda MPL9-ah Electric Vengin point an hlawh chhuak ta a, nimin tlai khan Chhinga Veng nen 0-0 in an inhnehtawk. RG Stadium-a inkhelah hian EFC keeper C. Vanlalhriata chu man of the match a thlan a ni.

Chhingcows hian I Day Football-ah Electric Veng hi 1-0 in an hneh tawh a, tun ṭumah pawh chak tura rin zawk ni mah se chance ṭha bik an insiam thei lo.

Chhinga Veng hian an striker pawimawh Lalrinzuala chu damlohna vangin an chhawr thei lo a, Serchhip tlangval hi tun season chhung inlan lo thei dinhmuna a din avangin coach Anand Gurung leh a hote hian a rang lamin tlarhma an siam ṭhat a ṭul dawn a ni.

Electric Veng tan pawh chanchin chhinchhiahtlak a awm. Hun tawp lamah tlarhnung tiphui turin V. Lalṭanpuia a rawn lut. Ṭ-a hi Mizoramin Santosh Trophy an champion ṭuma vice captain kha a ni a, hun rei tak Mizoram Police captain a ni bawk.

EFC coach Jacob Lalrawngbawla chuan, "First half-ah chance kan hlah a, second half-ah chuan kan khel ṭha lo zawk. Kan tan point khat hi a hlu em em a, phurna nasa tak min pe ang," tiin a sawi a, semifinal chungchang zawhna erawh match 10 khelh tur a la awm avangin engpawh a la thlen theih thu a sawi.