French Open an sawn nawn dawn?

French Tennis Federation (FTF) president Bernard Giudicelli chuan an rama inkharkhipna an hman zawh hunah chuan, player-ten mimal training an neih chhunzawm theih nghal mai a beisei. French Open chu a vawi hnih nan a hun sawn a ngai mai thei niin an sawi bawk.

Tennis player ṭhenkhat chuan inkharkhip chhung hian anmahni chenna inah training an nei thei a, an dinhmun a inan vek loh avangin player tam zawk tan chuan training neih ṭhat theih a ni ve lem lo.

FTF ruahman dan chuan, training tur player chu amahin a kal tur a ni a, ball paruk a keng ang; a ball ken chu a chhinchhiah vek ang a, amah ball chiah chu service nan a hmang ang, hrukpuan (towel) an ken chu la chhuak loin an bag chhungah an khung leh nghal zel tur a ni bawk.

French Open hi May thlaa khelh tur ni mah se hripui leng vangin September 20 aṭanga October 4 chhunga khelh turin an sawn. Covid-19 hian ziaawm lam a la pan hleithei lo a, tunah chuan a hun an sawn tawh pawh hi an sawn nawn leh mai thei.

FFT thupuangtu chuan, "International Tennis Federetion, ATP leh WTA nen inbiakna kan nei reng. Inelna sawn tura thutlukna kan siam hun kha March thla a ni a, a hnu lamah thil tam tak a danglam leh tawh, sumdawnna lama kan thawhpui leh sorkar thuneitute nen kan inbiak hnuah thu thar kan nei thuai ang," tiin clay court inelna lian chungchang a sawi.

French chanchinbu Le Parisien leh tennis website lar tennis.com ten an tarlan dan chuan Paris khawmpuia inelna lian neih tur hi an ruahman sa ai hian, chawlh kar khat vel chuan sawn tlai a ngaih hmel.

Wimbledon chu coronavirus vang hian an khel dawn lo chiang tawh, kumin bikah grass court season tawp an hmang dawn lo tihna a ni. August thla tawp leh September thlatir lama an khelh ṭhin US Open chu a hun pangngaiah khelh theih an la beisei thung.