FC Venghnuai hun a thleng ta

Zote Honda MPL9-ah FC Venghnuaiin chak hmel an hmu ta a, an hneh chu MPL vawi hnih champion tawh Chanmari FC an ni.

Ningani zan RG Stadium-a inkhelah Venghnuai tan C. Ramnunpuia (Tea Chinzah) leh Lalrammuanpuia (Apuia) ten an khung. Goal luh hnuah player pakhat ve ve hnawhchhuah an ni a, referee thutluknaah FC Venghnuai ṭantute an thinur hle.

An intluktawk
FC Venghnuaiin captain VL Thanga hrem vangin an chhawr thei lo a, inhliam vangin an ṭhat dan berin an la inrem thei lo.

Chanmari coach Rochhingpuia pawhin forward Lalnunzira an chhawr thei bik lo. Chhinga'n thil thar rawn enchhinin Salem Veng tlangval Joseph Lalnunpuia chu defence laiah dah loin tlarhmaah a dah.

MPL9 zan inkhel hmasa ber hi chhum zin vangin chawlh a ngai a, inkhelh hmuhnawmna a tlakhniam phah. Player hming enin Chanmari langsar zawk mah se khelmualah erawh Venghnuai an chungnung hret.

Venghnuai forward Mal-sawmzela (Valpuia) leh PC Lalhruaisanga ten Chanmari tlarhnung an rum ṭhaih a, goal hmuh tur erawh a awm lo. Chanmari keeper H. Lalrinzuala'n a hna a thawk ṭha.

A hmuhnawm ta
Chhum zing vangin halftime chawlh a rei hret a, inkhel an ṭan meuh chuan chhum zing a awm tawh loh avangin inkhel a hmuhnawm sawt.

Chanmariin Lalhriatpuia hmangin chance an insiam a, amaherawhchu box chhungah Hriata cross hi substitute Lalhmunmawia a tlawh hman lo.

Venghnuai lamin 'team game' ṭha tak an khel a, entu an neih ṭhat chu an ṭhatpui tel bawk. Minute 66-naah solo goal ropui hmuhin a awm a, Tea Chinzahin Chanmari right back Lalbiaknia a bum hnuah ṭha zetin box pawn aṭangin a pet goal.

Venghnuai an phur chhunzawm a, minutr 72-naah Tea Chinzah ball pek chu Apuia'n goal-ah pet nghalin Chanmari defender Lalramchullova kut a per. Armed Veng South tlangval Apuia hian goal-ah a chantir zui bawk.

Chanmari lamin an tlarhnung dinglam phui lo an siam ṭhat vat loh an tuar a, goal dang luh belh loin 2-0 in inkhel a tawp.

Red Card 2
Minute 70-na chhoah Chanmari substitute F. Lalnuntluanga'n Venghnuai keeper Joel B Lalramchhana let leh lam chu a kalh a, Ramchhana hi a tlu nghal. Venghnuai defender Lalruatfela chuan keeper hi chhan nghalin Tluangtea a rek a, player dang an rawn tlan khawm bawk.

Chanmari player zinga huangtau ber C. Lalhunmawia'n chuan yellow card vawi hnihna hmuin hnawhchhuah a ni. Venghnuai lamin thil tisualah inngai lo mah se Tluangtea rektu Ruatfela chu hnawhchhuah a ni ve bawk.

Venghnuai coach Lalrindika Hmar chuan, "Thil tisualtu ber Tluangtea hrem a nih loh laia Ruatfela hrem a ni bik kha ka hrethiam lo," tiin refereee thutluknaa a lawm loh thu a sawi.

Chanmari coach Chhinga pawhin, "MPL Handbook-ah Player pathum aia tamin eng vang pawha match official an hual chuan team captain chu yellow card pek tur a ni. Venghnuai player-te khan referee an hual fo a, card pek an ni lo," tiin a lungawi loh thu a sawi ve bawk.

Round 4
September 22, Ningani
FC Venghnuai 2-0 Chanmari FC
FCV: C. Ramnunpuia 66'; Lalrammuanpuia 72' (P)
MoM: C. Ramnunpuia, FC Venghnuai