Ronaldo-a'n chawlh mai a la tum lo

Cristiano Ronaldo chuan Euro 2024-ah pawh ram tana inlan a la duh cheu thu a sawi a, a sawi anga rei hi a khel thei tak tak a nih chuan kum 39 a ni tawh dawn tihna a ni.

Portugal captain hian ram tan major tournament pakua a khel tawh a, Euro 2004 kha a bul ṭanna chu a ni - kum 2016 khan Euro 2016-ah an ram team a champion pui a, 2018-19 Nations League-ah nomawi a chawi bawk.

Kum 37 mi Ronaldo chuan, "Player naupang tak tak, hma hun êng tak neite nen national team-ah kan awm ho a, World Cup khelh ho ka châk a, chutiang chiah chuan Euro pawh a ni tho mai.

"Ka hlim a, nomawi chawi ka châk leh tawh hle a ni. Ka khelhpui ṭhin, ka khelhpui zel tur te leh ex-player te ka en let hian, ka career-ah ka lawm takzet. Diogo Dalot hian min fiam fo a, 'I inkhelhpui vek tawh ni berin ka hria, hmanlai mi i ni ngei ang,' a ti ṭhin a ni," a ti a, a career hman danah a lawm hle.

Portugal captain Ronaldo hian Qatar-a World Cup an khelh ve theih nan, an ram tan qualifier-ah goal ruk lai a la khung a, ram tan match 189-ah goal 117 khungin, international football-ah ani aia khung hnem an la awm lo.

Ronaldo telna Portugal hian zanin dar 12:15 hian Nations League match khel turin Czech Republic an lenchilh dawn a, League A Group 2-ah point khat chauha hmahruaitu Spain an phak loh avangin, finals lut turin beiseina an la nei sang hle.

Chutihrual chuan Portugal hi an ṭhat dan berin an inlan thei dawn lo a, an fimkhur a ṭul dawn - Porto centre back Pepe leh Borussia Dortmund midfielder Raphael Guerreiro te chu hliam vangin an inlan thei dawn lo a, June thlaa 1-0 a Switzerland an ngam loh ṭuma tun inelnaa a yellow card pahnihna hmutu Joao Cancelo chu hrem vangin a inlan thei dawn lo bawk.

Portugal tana thil mak danglam ve tak chu Rafa Silva awm lo tur hi a ni - Portugal tana vawi 25 inlan tawh, Benfica attacking midfielder hian September 19 khan international football a chawlhsan thu a puang a, kum 29 mi chauh a la ni!