Zaninah Pro Fight seimifinal

Tata Yodha 4x4 LPS Pro Fight 2021 chu zaninah semifinal khelh ṭan a ni dawn. R. Dengṭhuama Indoor Stadium, Mualpuiah dar 8:00-ah ṭan a ni dawn a, inhnek panga a awm dawn - a hmuhnawm vek ang. A hmunah man chawia en theih a ni a, TV lamah LPS chuan an pe chhuak bawk.

Bantamweight ; F. Zoramchhana (Cherhlun) vs David Laldanmawia (Lunglei Ramthar)
F. Zoramchhana, Cherhlun, Mizoram
Kum 23; Weight 55.5; Height 5'6½"; Reach 5'7"

India super bantamweight number 1 ni mekin champion tura rin hlawh a ni a, November-ah Asian title chuh a tum. Professional huangah vawi thum chakin ṭum khat a tlawm tawh a, championship kal mekah Lalrohlua (Dinthar) leh Isaac Vanlalnunpuia (Chhippui) hnehin semifinal a lut.

David Laldanmawia, Lunglei Ramthar, Mizoram
Kum 17; Weight 55.1; Height 5'9";
Reach 5'9½"

Mizoram championship hrang hrangah gold medal paruk a hnek chhuak tawh a, championship kal mekah seeded boxer zinga mi niin Johan Ramngaihsanga (Luangmual) leh Ramdinthara (Pangzawl) hnehin boxrec-a hming chuang thei zingaha inhlangkai.

Lightweight ; Vanlalawmpuia (Khuangthing) vs Stephen Lalramsan Varte (Churachandpur)
Vanlalawmpuia, Khuangthing, Mizoram
Kum 25; Weight 63.1; Height 5'8";
Reach 5'9½"

Kum 2019 Pro Fight title fight-ah a tlawm a, professional luhchilh zuiin vawi li a chak tawh a, ṭum khat tlawmin vawi khat a inhnehtawk. Kumin September 15 khan Australia-ah feh chhuakin Ty Telford-a lakah a tlawm a, professional huanga a tlawm hmasak ber a ni nghal bawk. Pro Fight quarterfinal-ah inlan zuiin inhnial theih takin LT Mawia (New Champhai) a hneh hram.

Stephen Lalramsan, Churachandpur, Manipur
Kum 19; Weight 62.3; Height 5'6½"; Reach 5'8½"

Professional boxing vawi khat a khel tawh a, Pro Fight-ah a champion a nih chuan boxrec-ah chak record vawi hnih a neih belh dawn. Lalruatfela (Saithah) leh Lalnunsanga (Bawngkawn) hnehin semifinal a inhlangkai a, Vanlalawmpuia hmaah fiahna a hmachhawn ang.

Flyweight ; Laldinsanga (Lunglei, Ramthar) vs Joseph Lalremruata (Kulikawn)
Laldinsanga, Lunglei Ramthar, Mizoram
Kum 19; Weight 52.2; Height 5'5½"; Reach 5'7½"

Kum 2017 aṭangin boxing a khel ṭan a, Mizoramah vawi sarih champion tawhin national-ah best boxer leh best challenger-a thlan a ni tawh. K. Rothangliana (Thingkah) leh Alexis Kawlthangliana (Bethlehem) lakah awlsam taka chakin semifinal a lut.

Joseph Lalremruata, Kulikawn, Aizawl, Mizoram
Kum 22; Weight 51.6; Height 5'3½";
Reach 5'4"

Pro Fight-ah tawnhriat nei tawh mah se tun ṭumah seeded pek zingah a tel lo. David Ramfangliana (Nausel), Stephen Lalrindika (Ramrikawn, Tanhril), Lalchhuanawma (North Vanlaiphai) leh Vanlalenkawltira (Champhai) hnehin semifinal a lut. GIG Motors Fighter of the Night-a thlan a ni tawh bawk.

Featherweight ; Yuri Lalbiakdika Sanate (Vaitin) vs Lalmuanpuia (Lunglei Luangmual)
Yuri Lalbiakdika Sanate, Vaitin, Mizoram
Kum 24; Weight 58.6; Height 5'5½"; Reach 5'5½"

Kum 2019 Pro Fight title chuh tur zawnna final-ah rilru na takin a tla a, tun ṭumah eng emaw tal hlawhchhuah ngei a tum ruh hle. Round of 16 aṭangin a khel ṭan a, kawng hautak su tlangin Lalramdinliana (Sairang Dinthar) leh Nazareth Lalṭhazuala (Zemabawk) a hneh.

Lalmuanpuia, Lunglei Luangmual, Mizoram
Kum 20; Weight 57.2; Height 5'5½";
Reach 5'10"

SAI aṭanga inzir chhuak niin state championship-ah medal a la nual tawh. Pro Fight hi senior huanga amah fiahna pawimawh a ni. Technical knockout-in Laltanliana (Phunchawng) a hneh a, quarterfinal-ah Daniel Lalhriatkima Lallian (Chaltlang Lily Veng) hneh lehin GIG Motors Fighter of the Night-a thlan a ni.

Welterweight ; Zomuansanga (Khatla South) vs Lalnunzira (Teirei Forest)
Zomuansanga, Khatla South, Aizawl, Mizoram
Kum 24; Weight 69.6; Height 5'8";
Reach 5'8"

Kum 2019 Pro Fight-ah title chuh tur zawnna final a pal tlang zo lo. Mizoram aiawhin senior national-ah vawi hnih leh youth national-ah vawi hnih a tel tawh. Championship kal mekah Lalramdinmawia (Kawnmawi) leh Laltlanawma (Rangvamual) knockout ve vein a sawp.

Lalnunzira, Teirei Forest, Mizoram
Kum 19; Weight 69.8; Height 5'9";
Reach 6'

Boxing inelnaa a vawi khat telnaah Dalmuansiama (Vaikhawtlang) leh Lalthanzuala (Phulmawi) hnehin semifinal a lut. Boxrec-a hnuhma nei thei turin a dinhmun a siam a, Zomuansanga hmaah official-in professional a luhchilh dawn a ni.