France mamawh chhanna Giroud

Hliam vangin player ṭha tam tak an khel thei lo a, tun hnaiah France hian result ṭha an nei hleithei lo bawk - hun harsa an tawn laiin Olivier Giroud an ko a, ani hi mamawh chhanna chu a ni; an ram a chakpui.

Nilaini zan Nations League inkhelah Les Bleus hian an mikhual Austria chu 2-0 in an hneh, striker Giroud-a'n goal a khung hma hian forward ṭha mi Kylian Mbappe khung tur a siamsak bawk.

Paris khawpuia Stade de France-ah Giroud hi Ousmane Dembele chuan a rawn thlak, khelmual a chhuahsan dawn hian inkhel entu fans chu amah zahna lantir nan an ding a, kut bengin a hnenah lawmthu an sawi.

Record thar chu
Giroud-a'n goal a khung hian kum 35 leh ni 357 mi a ni a, an ram tana goal khung thei upa ber a ni. December, 1959 khan Roger Marche chuan Spain lakah France tana goal khung thei upa nihna record a lo siam tawh.

Marche-a record hi a awm rei hle, mahse tunah chuan Giroud hian a rawn khum; ni 70-in a upa zawk, goal dang a la khung belh zel a nih pawhin a mak lo ang, Les Bleus tana goal khung hnem ber ni turin kawng a inhawng mek.

France tan Giroud hian match 113 aṭangin goal 49 a khung a, ram tana goal khung hnem pahnihna a ni. A chungah hian goal 51 khungtu Thierry Henry a awm - World Cup hmain Nations League khelh tur an la neih avangin Giroud tan hun ṭha a awm dawn.

Coach a lungawi
France coach Didier Deschamps chuan, "Kan tih tur dik tak kan ti. Player zawng zawng rilru put hmang a dik, kan zavai khan goal kan khung piah lamah a venghim turin kan thawkrim vek, hnehna chang tur chuan khatianga kan khelh kha a ngai," a ti.

Group A-ah France hian beisei an phak lo, match nga an khelh tawh chinah point nga chiah an la hmu - an chungah hian Denmark leh Croatia te an awm a, an player neih dan chhutin an awmna hi dinhmun ṭha a ni lo.

Inkhel dangah Croatia chuan hmahruaitu ni turin Denmark chu 2-1 in an hneh a, anni hian khelh zat inangah point 10 an nei tawh thung. Croatia hian an match lehpekah Austria an hneh a nih chuan, nakkuma khelh tur Nations League Finals atan an tling ang.

Inkhelh a phu
Arsenal leh Chelsea tana a khelh laiin Giroud hi France tan rinrawl a ni a, Blues jersey a hak hunlaia a hun hnuhnungah a inkhel tam lo. AC Milan a zawm zui a, Italian club hi Serie A champion nihpui mah se Deschamps-a'n a ko tam lo.

Karim Benzema a inhliam a, striker palian Giroud khelh ṭhat lai a lo ni ve leh chiah - Arsenal striker hlui hi ram tan koh a ni a, an rama an mamawh ang ngeiin danglamna a siam, a khelh danah coach pawh a lawm.

France coach Didier Deschamps chuan, "Oliver-a'n goal khung thei upa record a siam a, a phu hle a ni. Club lamah hun harsa a tawng a, chutih lai pawh chuan a beidawng ngai lo, tunah chuan a nihna tak a lantir leh tawh," tiin a sawi.