Medvedev hnehtu Wawrinka

Stan Wawrinka chuan tun hnaia a khelh ṭhat a chhawm nung zel, nimin khan world number 1 hlui Daniil Medvedev hnehin Moselle Open quarterfinal a inhlangkai - semifinal thleng tur chuan Mikael Ymer a paltlang leh a ngai dawn a ni.

Grand Slam vawi thum champion tawh Wawrinka hi hliam vangin tun hnaiah a inkhel tam lo, a inkhelh hoah pawh beisei a phak lo. Tun dinhmunah world number 284 a ni a, mahse, a thiam a la theihnghilh chuang lo.

Russian tlangval lakah Wawrinka hian 6-4, 6-7 (7/9), 6-3 in hnehna a chang, tournament khel tur hian qualifying a khelh a ngai a, chuvangin quarterfinal thleng hian match li hnehna a chang tling ta chiah.

Kum 37 mi Wawrinka chuan, "Tun hun ang hi rei tak chhung chu ka lo nghak tawh, hetiang dinhmun ka thleng leh thei hi ka lawm hle," tiin a sawi a, a thlen chin aṭanga hmasawn zel a tum thu a sawi bawk.

Chak lo zawk Medvedev chuan, "Stan khan a khel ṭha zawk a, tun match bik atan chuan hnehna chan phu zawk a ni. Chak thei turin remchang chu ka hmu ve tho a, mahse hun pawimawh laiah ani kha a chet fuh zawk avangin ka lawmpui," tiin a sawi.

Nimin inkhel dangah Hubert Hurkacz chuan Dominic Thiem a hneh. US Open champion hlui Thiem hian a match hmasa lamah khel ṭha pangngai viau mah se, seeded pahnihna Hurkacz lakah hian 6-3, 6-4 in a chak lo.