Mizo hmeichhe boxer che ṭha

Khelo India Junior Girls & Youth Women's Open Boxing Championship, East Zone chu September 15-23 inkar khan neih a ni a, Mizo nulaten medal pali an hnek chhuak.

SAI Paltan Bazar, Guwahati, Assam-a neih inelnaah hian Vanlalrinngheti leh Naom Chingsannuami te chuan gold medal ve ve an hlawh chhuak a, Vanlalrinngheti hi Junior Girls (54kgs) ah inlanin, Chingsannuami hian Youth Women (57kg) ah gold medal hi a hlawh thung.

Rudy Lalhmingmuani'n silver medal hlawh chhuakin, Youth Women (63 kg) ah a inlan a, Lalnunthari (50kg) chuan Youth Women-ah vek bronze medal a hnek chhuak bawk.

Mizo boxer-te hi Mizoram SAI-a zirlai vek niin, Mizoram Boxing Association (MIZBA) hruaitute chuan nimin khan Lengpuiah boxer-te hi an lo hmuak a ni.