Switzerland hmachhawn tur Spain an ṭang!

Luis Enrique enkawl Spain chuan zanin dar 12:15 hian Nations League match khel turin Switzerland an mikhual dawn a, Spanish team hian inbuatsaihna an nei ngawrh tawh hle.

Barca boss hlui Enrique-a'n ṭum dang ang thoin sawi hat kai squad a ko leh a, player langsar koh loh zingah Paris Saint-Germain centre back Sergio Ramos leh Liverpool midfielder Thiago Alcantara an tel.

Spain hian League A Group 2-ah hma an hruai mek a, zaninah Switzerland an hneh a, Czech Republic an hneh bawk chuan finals an inpet kai ang - Switzerland erawh an tlawm chuan League B-a tlak a hnai sawt ang.

Squad sawi hlawh
Kum 36 mi ni tawh mah se Sergio Ramos-a'n a thiam a la theihnghilh lo a, season hmasaa hliam vanga talbuai defender hian tun season-ah PSG tan match 11 khel tawhin goal khat a khung a, tlarhnunga French club an ngheh theih chhan langsar a ni.

Mahse, Enrique-a'n Ramos tel lo pawhin an ṭha tawkah a ngai a, Real Madrid captain hlui a ko lo - hei hian sawi zui a hlawh hle. Hetihrual hian Liverpool midfielder Thiago chu koh a ni lo bawk a, hliam vanga a chawlh rei avangin hei erawh hriatthiam theih a nihna chen a awm.

Tun hnaiah Manchester United che ṭha mah se David de Gea tan Enrique squad-ah hmun a awm lo a, khawvela goalkeeper hlawh hnem pawl tan mangan a hun - November-ah World Cup khelh a ni tawh dawn! Athletic Bilbao keeper Unai Simón chuan zaninah pawh Spain tan si ban a nghak leh ang.

A vawi khatna
Enrique-a'n Spain tana la inlan ngai lo Borja Iglesias leh Nico Williams a ko a, a awm viau - Real Betis striker Borja Iglesias hian tun season-ah match ruk khelin goal ruk a khung a, Williams hian Athletic Bilbao tan a hming chherin, Inaki Williams nau a ni.

Nico hi Spain tana koh a nih laiin a unaupa erawh Ghana chuan Brazil leh Nicaragua nena an friendly match khelh tur atan an ko thung - international break-ah an unauin ram dang ve ve tan an inlan dawn tihna a ni!

Hetihlai hian hliam vangin Gerard Moreno, Mikel Oyarzabal leh Dani Olmo te chu Spain squad-ah an awm lo a, centre back Aymeric Laporte pawh hliam vangin a chawl bawk - Spain hian an ṭhat dan berin Switzerland an hmachhawn dawn lo.

Enrique a ṭang!
Spain boss Enrique-a'n training a uluk ṭhin a, tun international break-ah pawh tih dan thar a hmu chhuak leh tawh! Spanish coach hian khelmual sirah sang taka a dinna tur a siam tir a, heta ding chung hian a chhuk zawngin a naute training chu a thlir.

Barcelona boss hlui hian a player-te chu GPS vest hak tir vekin, hetah hian a player-te a biak pawhna tur an dah a, tower aṭanga inkhel thlir chungin, radio hmangin a naute training hi a vil!

Spain national team training chhimtu, Spanish journalist-te chuan Enrique training system hi a tih tlak hle niin an sawi a, player-ten direct taka an coach thupek an hriat theih avangin an ṭangkaipui hle.

Tu nge inlan dawn?
Enrique-a'n rin loh takin Barcelona-a hmun chang phak lo Jordi Alba chu squad-ah a telh a, ani hi Barca tana a khelhpui Eric García, Real Madrid right back Dani Carvajal leh Villarreal chhuanvawr Pau Torres te nen inkawp tura ngaih an ni.

Midfield-ah Barca rawlthar duhawm Gavi, Atletico Madrid captain Koke leh Barcelona tana player pawimawh la ni reng Sergio Busquets te chu inkawp tura ngaih an ni a, an la ṭha ṭhe ṭhaw hle - Pedri a la awm cheu tih theihnghilh lo la.

Barcelona forward Ferran Torres-a'n Nou Camp-ah beisei angin hmun chang lo mah se Enrique rin a la hlawh reng avangin bul ṭan tura beisei a ni a, a laiah Alvaro Morata awmin, PSG forward Pablo Sarabia chuan a thlawp thei bawk ang.

Switzerland lam
League A-a inhamtang zel turin Switzerland tan chak a ṭul a, mahse, kalkawng a awlsam lo - Red Bull Salzburg striker Noah Okafor chu damlohna avangin a inlan thei dawn lo a, Serie A club Torino left back Ricardo Rodriguez chu squad-ah tel mah se a dinhmun a chiang lo bawk.

Swiss team hian Arsenal tana season duhawm tak hmangtu Granit Xhaka an nei a, midfield-ah Nottingham Forest midfielder Remo Freuler leh Eintracht Frankfurt midfielder Djibril Sow te nen an inkawp thei ang.

Galatasaray striker Haris Seferovic chu innghahna a ni leh dawn a, AS Monaco forward Breel Embolo leh Chicago Fire midfielder Xherdan Shaqiri te an la awm bawk avangin Spain tan hna a awlsam dawn bik lo.