Number 1 nih rei tum Alcaraz

Mipa tennis player zinga world number 1 ni thei naupang ber Carlos Alcaraz chuan a dinhmun humhim zel a tum a, a theih anga rei number 1 nihna chelh a tum - kum 19 mi tan a chung bera awm reng hi thil awlsam erawh a ni lo mai thei.

US Open nomawi a chawi bakah Alcaraz hian number 1 nihna a luah a, tuna a hmachhawp lian ber chu world number 1 ni chunga season khar a ni. Season kal laiah Grand Slam awm tawh lo mah se tournament a khelh ngei a la ngai dawn.

Spanish rawlthar Alcaraz chuan, "Number 1 ni chunga kum tawp hman chu ka thil tum lian tak pakhat a ni. Ka team lam nen pawh kan sawi ho tawh, eng tiangin nge rei tak chhung ranking sang ka nih theih ang tih pawh ka ngaihtuah ve nasa

"ATP Finals khelh hmain tournament khelh hmabak pawh ka la nei. Inelna hmachhawn hnem ringawt a ni lo a, ṭha taka khelh theih a pawimawh, season kal laiah tournament ka khelh hnem tawh avangin inlanna tur pawh thlan uluk a ngai," a ti.

Alcaraz hian theihna a nei sang, kum naupang tak ni chungin Grand Slam nomawi pawh a la thei. Mahse, Novak Djokovic te nen an la inel dawn, ani aia tawnhriat ngah leh theihna nei sang tak tak nen an inel dawn - a nihna tak hi fiahin a awm chho dawn.