Raducanu tan nomawi a hnai

Emma Raducanu chuan US Open 2021 nomawi a chawi hnua a vawi khat nan champion a beisei leh mek. Nimin khan Magda Linette chu 6-2, 6-2 a hnehin Korea Open semifinal a lut.

New York khawpuia a hlawhtlin hnu khan Raducanu hian beisei a phak lo, tun ṭum hi semifinal a thlen lehna hmasa a ni hial. Champion tur chuan match hnih dang a chak leh phawt a ngai dawn, thil awlsam tak chu a ni lo ang.

Kum 19 mi Raducanu hian tun inelna khelh laiah hian match thum a khel tawh, set hloh miah loin hnena a chang vek. Quarterfinal bikah hian a service hmasa aṭangin 93% zet point a hmu thei a, a service ṭha chu a chakna hnar pawimawh a ni.

British tleirawl Raducanu chuan, "Tumna a awm chuan kawng pawh a awm mai ṭhin. Tournament ka khelh hnuhnung hoah ka result a ṭha tawk lo a, hei vang hian ka ranking pawh nasa takin a tlahniam, mahse chumi siamṭha leh theitu chu keimah tho ka ni tih ka hria.

"Beiseina sang tak nen Korea ka pan a, he hmunah hian nomawi ka chawi phak ta chiah lo a nih pawhin ka thlen chin hi a lawmawm ka ti, ka tan chuan hriatreng tur a ni tawh, chutih rualin a tawpa title latu nih erawh ka tum," tiin a sawi.