A rang thei ang berin kan inkhel leh ang - BWF chief

Badminton World Federation chief Thomas Lund chuan inkhelh leh hun tur sawi lawk a harsa a ti a, chutihrualin hun remchang an hmuh hmasak ber aṭangin inelna an neih ṭan leh nghal tur thu a sawi bawk.

Badminton hi a inkhel player-te inhnaihchilh lo mah se ram hrang hranga zinkual ngai chi a ni. Covid-19 vangin ram tam zawk an inkharkhip a, tournament buatsaih chu sawi loh, ram hrana zin ringawt pawh thil tih theih a ni rih lo a ni.

BWF chief Thomas Lund chuan, "Kumin atana BWF tournament calendar chu siam ṭhat a ni a, a rang thei ang berin inelna pawh kan neih chhunzawm theih ka beisei. Mahse, tun dinhmunah chuan ram ṭhenkhat hian engtik hunah nge mikhual an thlen duh dawn tih hriat a la ni lo.

"Mimal zalenna a pawimawh, chu aia pawimawh zawk chu ram pum sorkarin inkaihhruaina dan a siam zawm ṭhat a ni. Player mai bakah coaching staff leh tournament buatsaihtu zawng zawng an him tlanna tur thil kan ngaihtuah tel a ngai," a ti.

Nakkuma neih tur Badminton World Championship chu Tokyo Olympic 2020 neih hun sawn a nih avangin a in nang buai dawn, badminton inelna lian hi nipui laia neih tur ni mah se thlasik laia khelh turin an sawn hla.